కాంగ్రెస్ కార్యకర్తల విజయోత్సవం

దిశ, చిట్యాల : ఆదివారం వెలువడుతున్న అసెంబ్లీ ఫలితాల నేపథ్యంలో కాంగ్రెస్ పార్టీ అభ్యర్థులు అన్నిచోట్ల విజయ దుందుభి మోగిస్తున్న సందర్భాన్ని పురస్కరించుకొని ఆ పార్టీ కార్యకర్తలు ఆనందోత్సవాలను ఘనంగా జరుపుకున్నారు. నకిరేకల్ నియోజకవర్గంలో కాంగ్రెస్ పార్టీ అభ్యర్థి వేముల వీరేశం 38 వేలకు పైగా మెజార్టీతో అధికార పార్టీ అభ్యర్థి పై లీడింగ్లో ఉండడంతో నియోజకవర్గ పరిధిలోని చిట్యాల పట్టణ కేంద్రంలో కాంగ్రెస్ పార్టీ కార్యకర్తలు, నాయకులు, అభిమానులు భారీ ఉత్సవాలను నిర్వహిస్తున్నారు. పట్టణ కేంద్రంలోని కనకదుర్గ సెంటర్లో మున్సిపల్ చైర్మన్ కోమటిరెడ్డి వెంకటరెడ్డి ఆధ్వర్యంలో కేక్ కట్ చేసి సంబురాలు జరిపారు. అనంతరం భారీ బాణసంచా పేల్చి రంగులు చల్లుకొని అభిమానాన్ని చాటుకున్నారు.

ఎన్నికల కమిషన్ ఆదేశాలు బేఖాతర్..

ఎన్నికల ఫలితాల దృష్ట్యా ఆదివారం రాష్ట్రంలో ఎక్కడ కూడా రాజకీయ పార్టీలు గానీ, నాయకులుగానీ ఎలాంటి ర్యాలీలు, సభలు, సమావేశాలు జరుపుకోరాదని రాష్ట్ర ఎన్నికల కమిషనర్ స్పష్టమైన ఆదేశాలు జారీ చేశారు. అయినప్పటికీ అవేమీ పట్టనట్లుగా కాంగ్రెస్ పార్టీ నాయకులు, కార్యకర్తలు పట్టణ కేంద్రంలో భారీ బైక్ ర్యాలీ నిర్వహించి అనంతరం పట్టణ కేంద్రంలో విజయోత్సవాలు నిర్వహించారు.