లక్ష్మీ బాంబ్‌కు ‘అక్షయ్’ సెంటిమెంట్ బామ్
బాలీవుడ్ హీరో అక్షయ్ కుమార్ వరుస విజయాలతో దూసుకుపోతున్నారు. అత్యధిక సంపాదన కలిగిన సెలబ్రిటీల్లో ఫోర్బ్స్ జాబితాలోనూ చోటు సంపాదించాడు. ఒకే ఏడాదిలో అత్యధిక చిత్రాలు చేస్తున్న బాలీవుడ్ హీరో అక్షయ్ కాగా.. రోహిత్ శెట్టి దర్శకత్వంలో తెరకెక్కిన సూర్య వంశీ, రాఘవ లారెన్స్ దర్శకత్వంలో వస్తున్న ‘లక్ష్మీ బాంబ్’ చిత్రాలు ప్రస్తుతం విడుదలకు సిద్ధంగా ఉన్నాయి. కానీ లాక్‌డౌన్ కారణంగా ఇప్పట్లో థియేటర్స్ ఓపెన్ అయ్యే ఛాన్స్ లేదు. దీంతో ‘లక్ష్మీ బాంబ్’ సినిమాను డైరెక్ట్ ఓటీటీలో రిలీజ్ చేసేందుకు ఫిక్సయ్యారు దర్శక, నిర్మాతలు. కానీ ఏ రోజున సినిమా రిలీజ్ అవుతుందన్న విషయంపై మూవీ యూనిట్ క్లారిటీ ఇవ్వలేదు .
కాగా, ఆగస్ట్ 15వ తేదీన ‘లక్ష్మీ బాంబ్’ సినిమా విడుదలయ్యే అవకాశం ఉన్నట్లు తెలుస్తోంది. అక్షయ్ కుమార్ ‘రస్తుం, గోల్డ్, మిషన్ మంగళ్‌యాన్’ సినిమాలు ఇదే రోజు విడుదలై సక్సెస్ కావడంతో.. ఈ డేట్ అక్షయ్‌కు సెంటిమెంట్‌గా మారింది. దీంతో ఇదే రోజున ఓటీటీలో సినిమా విడుదల చేయాలని నిర్ణయించుకున్నారట. కాగా అక్షయ్ కుమార్ సరసన కియారా అద్వానీ నటిస్తున్న ఈ సినిమా ‘కాంచన’ రీమేక్ అన్న విషయం తెలిసిందే.
