రోడ్డు ప్రమాదంలో మహిళ దుర్మరణం

దిశ, తాండూర్ : మండలంలోని బోయపల్లి గ్రామానికి చెందిన మాసాడి సరోజ (45) అనే మహిళ మంగళవారం జరిగిన రోడ్డు ప్రమాదంలో మృతి చెందింది. తాండూర్ ఎస్సై కిరణ్ కుమార్ తెలిపిన వివరాల ప్రకారం... సరోజ తన కుమారుడు అజయ్ తో కలిసి ద్విచక్ర వాహనంపై బోయపల్లి రైతు వేదిక వద్దకు వెళ్లి భూమికి సంబంధించిన జిరాక్స్ కాపీలను ఇచ్చేందుకు ఇంటి నుంచి బయలుదేరారు.

ద్విచక్ర వాహనం పై నుండి సరోజ ప్రమాదవశాత్తు కింద పడగా తీవ్ర గాయాలయ్యాయి. చికిత్స నిమిత్తం ఆమెను బెల్లంపల్లి ప్రభుత్వ ఆసుపత్రికి తరలించారు. ఆమె పరిస్థితి విషమంగా ఉండడంతో మెరుగైన చికిత్స కోసం మంచిర్యాలలోని ప్రైవేటు ఆసుపత్రికి తరలిస్తుండగా మార్గమధ్యలో మృతి చెందింది. మృతురాలి భర్త మాసాడి సత్యనారాయణ తాండూర్ జెడ్పీఎస్ ఎస్ లో స్కూల్ అసిస్టెంట్ గా పని చేస్తున్నారు. మృతురాలి కుటుంబ సభ్యుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై తెలిపారు.