చైనాలో భారీ అగ్ని ప్రమాదం: 13 మంది మృతి
దిశ, నేషనల్ బ్యూరో: చైనాలో భారీ అగ్ని ప్రమాదం సంభవించింది. హెనాన్ ప్రావీన్సులోని యన్‌షాన్‌పు గ్రామంలోని యింగ్‌కాయ్ పాఠశాల వసతి గృహంలో శుక్రవారం అర్ధరాత్రి ఈ ఘటన జరగగా.. 13 మంది మృతి చెందారు. మరో వ్యక్తి తీవ్రంగా గాయపడ్డాడు. ప్రమాదం జరిగిన వెంటనే ఘటనా స్థలానికి చేరుకున్న ఫైర్ సిబ్బంది సహాయక చర్యలు చేపట్టి మంటలకు అదుపులోకి తీసుకొచ్చారు. గాయపడిన వ్యక్తిని ఆస్పత్రికి తరలించారు. ప్రమాదానికి గల కారణాలు తెలియరాలేదు.. అయితే పాఠశాల యాజమాన్యానికి చెందిన ఆరుగురిని పోలీసులు అదుపులోకి తీసుకున్నారు. మృతుల్లో ఎంత మంది పిల్లలు ఉన్నారో అధికారులు వెల్లడించలేదు. కాగా, ఇటీవల చైనాలో ఫైర్ ఆక్సిడెంట్స్ సర్వ సాధారణమయ్యాయి. గతేడాది నవంబర్‌లో ఉత్తర చైనాలోని షాంగ్సీ ప్రావిన్స్‌లోని బొగ్గు కంపెనీ కార్యాలయంలో జరిగిన అగ్ని ప్రమాదంలో 26 మంది మరణించారు. బీజింగ్‌లోని ఒక ఆస్పత్రిలో అగ్నిప్రమాదం జరగగా.. 29 మంది, అంతేగాక వాయువ్య చైనాలోని బార్బెక్యూ రెస్టారెంట్‌లో పేలుడు సంభవించి 31 మంది మృతి చెందారు.
