తనపై చెడుగా ప్రచారం చేస్తున్నాడనే బీటెక్​ విద్యార్థి హత్య

దిశ, బడంగ్ పేట్​ : సంచలనం సృష్టించిన ఇంజనీరింగ్​ విద్యార్థి హత్య కేసు మిస్టరీని బాలాపూర్​ పోలీసులు ఛేదించారు. తన ప్రియురాలితో చాటింగ్​ చేయడంతో పాటు తనపై చెడుగా చెబుతున్నాడన్న అనుమానంతోనే మాధవ్​యాదవ్​ పక్కా ప్రణాళికతో ప్రశాంత్​ను ఆరుగురు స్నేహితులతో కలిసి హతమార్చినట్లు పోలీసు విచారణలో వెల్లడించాడు. ప్రశాంత్​ను హత్య చేసి తప్పించుకు తిరుగుతున్న ఏడుగురు నిందితులను బాలాపూర్​ పోలీసులు అరెస్ట్​ చేసి, రిమాండ్​కు తరలించారు. వారి వద్ద నుంచి ఏడు సెల్ ఫోన్ లతో పాటు ఐదు బైక్ లు, ఒక కత్తిని పోలీసులు స్వాధీనం చేసుకున్నారు. బాలాపూర్​ ఇన్​స్పెక్టర్​ తోట భూపతి తెలిపిన వివరాల ప్రకారం ... ఖమ్మం జిల్లా అయ్యవారి గూడెం ప్రాంతానికి చెందిన మోండ్రు అనిత, శాంతయ్య కుమారుడు మోండ్రు ప్రశాంత్​ (21) నాదర్​గూల్​లోని ఎంవీఎస్సార్ ఇంజనీరింగ్​ కళాశాల ద్వితీయ సంవత్సరం చదివేవాడు.

గత కొంత కాలం క్రితం తన తల్లి అనితతో కలిసి బతుకు తెరువు కోసం బాలాపూర్​ గ్రామానికి వలస వచ్చారు. తల్లి అనిత ఇళ్లలో పాచిపని చేస్తూ కుమారుడు ప్రశాంత్​ను చదివిస్తుంది. ఇది ఇలా ఉండగా బాలాపూర్​కు చెందిన పి.రమేష్​ కుమారుడు పోచబోయిన మాధవ్​ యాదవ్​ (24) వృత్తి రీత్యా పాల వ్యాపారి. ఇతనికి కొంత కాలం క్రితం మోండ్రు ప్రశాంత్​తో పరిచయం ఏర్పడింది. మాధవ్​ యాదవ్​ కు ప్రశాంత్​ కు మధ్య 10 నెలల నుంచి చిన్న చిన్న విషయాల్లో గొడవ జరిగేది. దీంతో ప్రశాంత్​ పై మధవ్​ యాదవ్ మనస్సులో కక్ష పెంచుకున్నాడు. అంతేగాకుండా తన ప్రియురాలితో ప్రశాంత్​ చాటింగ్​ చేయడంతో పాటు తనపై చెడుగా చెబుతున్నాడనే అనుమానం రోజు రోజుకు పెంచుకోసాగాడు. ఈ నేపధ్యంలోనే ప్రశాంత్​ను ఎలాగైనా హత్య చేస్తామని తన స్నేహితులైన నాదర్​ గూల్​ కు చెందిన చింతాల మహేష్​ యాదవ్​ అలియాస్​ మళ్లి కార్జున్​ (25), నాదర్​గూల్​కు చెందిన నామోజు సుమంత్​ చారి, బాలాపూర్​కు చెందిన నల్లపూసల మహేష్​, బాలాపూర్​ గ్రామానికి చెందిన దొడ్డి హరీష్​, బాలాపూర్​ గ్రామానికి చెందిన అఖిల్​ కిరణ్​ కుమార్​, నాదర్​గూల్​ కు చెందిన కొహెడ యశ్వంత్​తో కలిసి నిందితుడు హత్యకు పథకం రూపొందించాడు. ఈ నెల 22వ తేదీన బాలాపూర్​లోని గణేష్​ చౌక్​ ప్రాంతంలోని 37మండి అరేబియన్​ బిర్యాని సెంటర్​ను అనువుగా ఎంచుకున్నారు.

ఎంవీఎస్సార్​ ఇంజనీరింగ్​ కళాశాలలో పరీక్ష రాసి ఇంటికి వెళ్తున్న ప్రశాంత్​కు ఫోన్​ చేసి బిర్యాని సెంటర్​ వద్దకు పిలుచుకున్నారు. అక్కడ పాన్​ షాప్​ వద్ద ముందుగా వేసుకున్న పథకం ప్రకారం మాధవ్​ యాదవ్​ గొడవకు దిగాడు. వెంట తెచ్చుకున్న కత్తితో ప్రశాంత్​పై విచక్షణా రహితంగా దాడిచేశాడు. పక్కనే ఉన్న చింతాల మహేష్​ యాదవ్​, నామోజు సుమంత్​ చారిలు ప్రశాంత్​ చేతులపై దాడిచేశారు. తీవ్ర గాయాలపాలైన ప్రశాంత్​ అక్కడికక్కడే మృతిచెందడంతో మాధవ్​ యాదవ్​తో పాటు మరో ఆరుగురు స్నేహితులు పరారయ్యారు. మృతుని తల్లి అనిత ఇచ్చిన ఫిర్యాదు మేరకు బాలాపూర్​ పోలీసులు కేసును నమోదు చేసుకుని, సీసీ కెమెరాల ద్వారా హత్యచేసి పారిపోతున్న నిందితులను గుర్తించారు. మహేశ్వరం డీసీపీ సునీతా రెడ్డి పర్యవేక్షణలో పోలీసులు 5 బృందాలుగా ఏర్పడి ప్రశాంత్​ను హత్య చేసి తప్పించుకు తిరుగుతున్న మాధవ్​ యాదవ్​ తో పాటు మహేష్​యాదవ్, సుమంత్​చారి, నల్ల పూసల మహేష్​, దొడ్డి హరీష్​, అఖిల్​ కిరణ్​ కుమార్​, కొహెడ యశ్వంత్​లను అదుపులోకి తీసుకుని శనివారం సాయంత్రం రిమాండ్​కు తరలించారు. ఈ కేసును బాలాపూర్​ పోలీసులు దర్యాప్తు చేస్తున్నారు.