రద్దీ ప్రాంతాల్లో సెల్ఫోన్లు దొంగిలిస్తున్న ముఠాలోని నలుగురు అరెస్ట్
దిశ, చార్మినార్ : రద్దీ ప్రాంతాల్లో సెల్ ఫోన్లు దొంగిలిస్తూ తప్పించుకు తిరుగుతున్న ఓ ముఠాలోని నలుగురు వ్యక్తులను సౌత్జోన్ టాస్క్ఫోర్స్ పోలీసులు అదుపులోకి తీసుకున్నారు. దొంగిలించిన సెల్ఫోన్లను కొనుగోలు చేస్తున్న మరో ఇద్దరిని సైతం పోలీసులు కటకటాల వెనక్కి పంపించారు. వారి వద్ద నుంచి రూ.3లక్షల విలువైన సొత్తును సౌత్జోన్ టాస్క్ఫోర్స్ పోలీసులు స్వాధీనం చేసుకుని తదుపరి విచారణ నిమిత్తం ఆరుగురి నిందితులను హుస్సేని హాలం, ఐఎస్ సదన్ పోలీసులకు అప్పగించారు. సౌత్ జోన్ టాస్క్ పోర్స్ ఇన్స్పెక్టర్ రాఘవేంద్ర తెలిపిన వివరాల ప్రకారం ... షాహిన్నగర్ కు చెందిన మొహమ్మద్ అబ్బాస్ ఆలీ అలియాస చోర్ అబ్బాస్ అలియాస్ లౌడ్ అబ్బాస్ (60) హుస్సేనిహాలం పోలీస్ స్టేషన్ రౌడీ షీటర్. అదే ప్రాంతానికి చెందిన మొహమ్మద్ రిజ్వాన్ (24), భవానీనగర్ కు చెందిన మొహమ్మద్ సాధిక్ అలియాస్ చోటా మూసా (22), కంచన్బాగ్కు చెందిన మొహమ్మద్ దస్తగిరి (48), రెయిన్ బజార్కు చెందిన షేక్ అజాహర్ అలియాస్ అజ్జు (30) వీళ్ళంతా హైదరాబాద్లో పుట్టి పెరిగిన వాళ్ళే.
ప్రధాన నిందితుడు మొహమ్మద్ అబ్బాస్ ఆలీ 1989 నుండే నేరాలు చేయడం ప్రారంభించాడు. ఇతనిపై ఇప్పటి వరకు 37 పాత కేసులు ఉన్నాయి. మొదట పండ్ల వ్యాపారం చేసే అబ్బాస్ ఆలీకి వస్తున్న సంపాదన సరిపోక పోవడంతో విలాసవంతమైన జీవితం కోసం స్నాచింగ్, సెల్ ఫోన్ దొంగతనాలే వృత్తిగా ఎంచుకున్నాడు. ఈ నేపథ్యంలో మొహమ్మద్ రిజ్వాన్, మొహమ్మద్ సాధిక్,మొహమ్మద్ దస్తగిరి లతో కలిసి ఓ ముఠాను తయారు చేశాడు. ముందుగా వేసుకున్న పథకం ప్రకారం.. హైదరాబాద్, రాచకొండ కమిషనరేట్ పరిధిలలోని రద్దీ ప్రాంతాలలో సెల్ఫోన్లు తస్కరించడం, ఎవరైనా అడ్డుకోవడానికి ప్రయత్నిస్తే కత్తి చూపెట్టి బెదరకొట్టేవారు.
దొంగిలించిన సెల్ఫోన్లను మొహమ్మద్ సత్తార్, షేక్ అజహర్లకు విక్రయించేవారు. విశ్వసనీయ సమాచారం మేరకు టాస్క్ఫోర్స్ అదనపు డీసీపీ అందెశ్రీనివాస్ పర్యవేక్షణలో సౌత్ జోన్ టాస్క్ఫోర్స్ ఇన్స్పెక్టర్ ఎస్.రాఘవేంద్ర , ఎస్ఐలు ఎం.మహేష్, కె.నర్సింహులు, జి.ఆంజనేయులు, ఎన్.నవీన్ ల బృందం హుస్సేనిహాలం ప్రాంతంలో అనుమాన స్పదంగా సంచరిస్తున్న ఆరుగురిని అదుపులోకి తీసుకుని, విచారించంగా చేసిన నేరాణ్ని అంగీకరించారు. వారి వద్ద నుంచి 8 సెల్ఫోన్లు, ఒక కత్తి, ఆటోను పోలీసులు స్వాధీనం చేసుకుని తదుపరి విచారణ నిమిత్తం వారిని హుస్సేని హాలం పోలీసులకు అప్పగించారు. ఈ కేసును హుస్సేనిహాలం పోలీసులు దర్యాప్తు చేస్తున్నారు.
