అమరావతి రైతులతో వైసీపీ ఎమ్మెల్యే భేటీ..అసలు జరిగిందేంటంటే!

దిశ, ఏపీ బ్యూరో: అమరావతి రైతులను వైసీపీ ఎమ్మెల్యే కోటంరెడ్డి శ్రీధర్ రెడ్డి పరామర్శించారు. నెల్లూరు రూరల్ నియోజకవర్గ పరిధిలోని కొత్తూరు.. అంబాపురం వద్ద పర్యటిస్తున్న కోటంరెడ్డి శ్రీధర్‌రెడ్డి అమరావతి రైతులు అక్కడే ఉన్న శాలివాహన కళ్యాణ మండపంలో ఉండటంతో వారిని పరామర్శించారు.

వర్షాల వల్ల వారి ఆరోగ్య పరిస్థితి, వారు పడుతున్న ఇబ్బందులను అడిగి తెలుసుకున్నారు. ఈ సందర్భంగా ఎమ్మెల్యే కోటంరెడ్డి శ్రీధర్ రెడ్డి మాట్లాడుతూ…‘మహాపాదయాత్ర ప్రస్తుతం నా నియోజకవర్గంలో నడుస్తుంది. నా నియోజకవర్గం మీదుగా వెళ్తున్నారు. మీకు ఏ అవసరం వచ్చినా చెప్పండి తప్పకుండా సహకరిస్తా’ అని ఎమ్మెల్యే హామీ ఇచ్చారు. అయితే జై అమరావతి అనాలని కొందరు రైతు నేతలు కోరగా ఎమ్మెల్యే కోటం రెడ్డి శ్రీధర్ రెడ్డి సున్నితంగా తిరస్కరించారు. ‘నేను ఏమీ అనలేను..ఇబ్బంది పెట్టొద్దు. నెల్లూరు రూరల్ నియోజకవర్గం లో ఉన్న ప్రతి ఒక్కరి క్షేమ సమాచారాలు తెలుసుకోవడం నా కర్తవ్యం. మానవతా దృక్పథంతోనే అమరావతి రైతులు, మహిళలను పరామర్శించా’ అని ఎమ్మెల్యే కోటంరెడ్డి శ్రీధర్ రెడ్డి స్పష్టం చేశారు.