మానవ హక్కులను కాలరాస్తూ ‘ఇజ్రాయెల్ - హమాస్’ యుద్ధం: ఐరాస

దిశ, నేషనల్ బ్యూరో : ఇజ్రాయెల్ - హమాస్ యుద్ధంపై ఐక్యరాజ్యసమితి మానవ హక్కుల విభాగం చీఫ్ వోల్కర్ టర్క్ కీలక వ్యాఖ్యలు చేశారు. ఈ వివాదంతో సంబంధమున్న అన్ని పక్షాలు యుద్ధ నేరాలకు పాల్పడ్డాయని ఆయన పేర్కొన్నారు. వాటిపై దర్యాప్తు చేసి, బాధ్యులకు తగిన శాస్తి జరిగేలా చూడాలని పిలుపునిచ్చారు. అంతర్జాతీయ మానవ హక్కుల చట్టాలను కాలరాసేలా ఈ యుద్ధం జరిగిందని చెప్పడంలో సందేహం లేదన్నారు. స్విట్జర్లాండ్‌లోని జెనీవాలో ఐరాస మానవ హక్కుల కౌన్సిల్‌ సమావేశంలో వోల్కర్ టర్క్ ఈ కామెంట్స్ చేశారు. శాంతి, విచారణ, జవాబుదారీతనంలపై ఫోకస్ చేసే సమయం గడిచిపోయిందని, పరిస్థితులు చేయి దాటాయని ఆయన ఆవేదన వ్యక్తం చేశారు. పాలస్తీనాలోని గాజా, ఇజ్రాయెల్ ఆక్రమిత వెస్ట్ బ్యాంక్‌లో మానవ హక్కుల పరిస్థితిపై ఓ నివేదికను ఈసందర్భంగా వోల్కర్ టర్క్ విడుదల చేశారు. ఇజ్రాయెల్ దళాలు చేసిన అనేక యుద్ధ నేరాల గురించి ఈ నివేదికలో ప్రస్తావించారు. ఇజ్రాయెల్ బలగాలు అంతర్జాతీయ చట్టాలను ఉల్లంఘిస్తూ విచక్షణారహితంగా మానవ హక్కులను ఉల్లంఘిస్తున్నాయని ఆయన ఆగ్రహం వ్యక్తం చేశారు. ఇజ్రాయెలీలను కిడ్నాప్ చేయడం, దక్షిణ ఇజ్రాయెల్‌పైకి రాకెట్లను ప్రయోగించడం ద్వారా పాలస్తీనా సాయుధ గ్రూపులు కూడా హింసకు దిగాయన్నారు.