Houthis: యెమన్‌పై ఇజ్రాయెల్ దాడి.. హౌతీల స్థావరాలే లక్ష్యం
దిశ, నేషనల్ బ్యూరో: లెబనాన్‌లో విధ్వంసం సృష్టించిన ఇజ్రాయెల్ తాజాగా యెమన్‌లోని హౌతీ మిలిటెంట్ల స్థావరాలే లక్ష్యంగా విరుచుకుపడింది. వారి కీలకమైన మౌలిక సదుపాయాలపై ఆదివారం వైమానిక దాడులు చేసింది. యెమన్‌లోని రాస్ ఇస్సా , హోడెయిడా ఓడరేవుల్లోని ఫైటర్ జెట్‌లు, పవర్ ప్లాంట్లే లక్ష్యంగా చేసుకున్నట్లు ఇజ్రాయెల్ డిఫెన్స్ ఫోర్సెస్ (ఐడీఎఫ్) తెలిపింది. ఇజ్రాయెల్‌పై హౌతీలు ఇటీవల బాలిస్టిక్ క్షిపణి దాడులకు ప్రతిస్పందనగా దాడులు నిర్వహించినట్టు వెల్లడించింది. ఈ దాడుల్లో నలుగురు మరణించగా 29 మంది గాయపడ్డట్టు హౌతీ ఆధ్వర్యంలో నడిచే ఆరోగ్య మంత్రిత్వ శాఖ వెల్లడించింది. ఈ అటాక్స్‌పై హౌతీలు ఆగ్రహం వ్యక్తం చేశారు. ఇజ్రాయెల్ దురాక్రమణను ఖండిస్తున్నట్టు తెలిపారు. అయితే ఏడాది కాలంగా హౌతీ తిరుగుబాటుదారులు ఇరాన్ సహాయంతో, ఇజ్రాయెల్‌పై దాడులు చేస్తున్నారని ఐడీఎఫ్ తెలిపింది. అంతేగాక ప్రాంతీయ స్థిరత్వాన్ని అణగదొక్కడంతోపాటు సముద్ర రవాణాకు భంగం కలిగిస్తున్నారని ఆరోపించింది.
