PM Modi : ‘యంగ్ లీడర్స్ డైలాగ్’ క్విజ్‌లో పాల్గొనండి.. యువతకు ప్రధాని మోడీ పిలుపు
దిశ, స్పోర్ట్స్ : ‘వికసిత్ భారత్ యంగ్ లీడర్స్ డైలాగ్’ పేరుతో నిర్వహించే క్విజ్ పోటీలో యువకులు పాల్గొనాలని ప్రధాని మోడీ బుధవారం పిలుపునిచ్చారు. సోషల్ మీడియా ప్లాట్ ఫామ్ ‘ఎక్స్’ వేదికగా ఈ మేరకు ప్రధాని ప్రకటన చేశారు. ‘వికసిత్ భారత్’ లక్ష్యాన్ని చేరుకునేందుకు యువకుల సహాకారం కావాలని మోడీ తెలిపారు. వచ్చే ఏడాది జనవరి 12న చారిత్రాత్మక వికసిత్ భారత్ యంగ్ లీడర్స్ డైలాగ్ నిర్వహిస్తున్నామన్నారు. ఈ వేదిక ద్వారా యువత తమ వినూత్న ఆలోచనలను ప్రభుత్వానికి తెలిపే వీలు ఉంటుందన్నారు. ఈ ట్వీట్‌కు కేంద్ర యువజన, క్రీడా శాఖ మంత్రి మన్సుక్ మాండవీయ బదులిస్తూ.. వికసిత్ భారత్‌ను వెనక ఉండి నడిపిస్తోంది యువతే అన్నారు. మీ ఆలోచనలు, సలహాలు దేశ భవిష్యత్తు నిర్మాణానికి ఎంతగానో దోహదపడతాయన్నారు. http://mybharat.gov.in వెబ్‌సైట్‌లో రిజిస్టర్ అయి వికసిత్ భారత్ క్విజ్ చాలెంజ్‌లో పాల్గొనవచ్చని ఆయన తెలిపారు.
