కాంగ్రెస్ ఆశలన్నీ ‘జానా’పైనే.. సమరమా.. సన్యాసమా?
దిశ, తెలంగాణ బ్యూరో : కాంగ్రెస్కు గ్రేటర్‌ నుంచి గ్రాడ్యుయేట్‌ ఎమ్మెల్సీదాకా.. ఏ ఎలక్షన్‌ వర్కవుట్‌ కాకపోవటంతో సాగర్‌పై గురిపెట్టింది. అయితే ఇప్పటి వరకు కాంగ్రెస్దే పైచేయి అన్నట్టుగా ఉన్నా… సమీకరణాలు మారుతున్నాయని అంచనా వేస్తున్నారు. బీజేపీ నుంచి రవి కుమార్ నాయక్ను బరిలోకి దింపడంతో కాంగ్రెస్ ఓటు బ్యాంకుకే ప్రమాదమని రాజకీయ విశ్లేషకుల వాదన. అటు సానుభూతితో పాటుగా సంక్షేమ ఓటు బ్యాంకును నమ్ముకున్న టీఆర్ఎస్ బాస్… నోముల తనయుడు భగత్ను బరికి దింపారు. దీంతో బీసీ ఓట్లతో పాటుగా సానుభూతి కలిసి వస్తుందనే ఆశ. ఈ లెక్కన ఓటింగ్లో జానారెడ్డి ఓట్లకే గండి పడుతుందనుకుంటున్నారు. సుదీర్ఘ రాజకీయ అనుభవం, ఏడు పర్యాయాలు ఒకే సెగ్మెంట్ నుంచి ప్రాతినిధ్యం వహించిన జానారెడ్డికి ఈసారి సెగ్మెంట్ ప్రజలు పట్టం కడుతారా అనేది ఇప్పుడు హాట్ టాపిక్. ఒకవేళ జానాకు పట్టం కడితే టీపీసీసీ రేసులో ముందున్నట్టే. అంచనాలు కూడా తలకిందులై జానా మళ్లీ ఓడితే ఇక రాజకీయ సన్యాసమే అంటున్నారు.
కాంగ్రెస్ ట్రెండ్ మారేనా..?
మరోవైపు కాంగ్రెస్ ఇటీవల కాలంలో ఎక్కడా పోటీ కూడా ఇవ్వలేక వెనకబడుతోంది. దుబ్బాక నుంచి మొన్నటి పట్టభద్రుల ఎమ్మెల్సీ దాకా తెలంగాణలో టీఆర్ఎస్ వర్సెస్‌ బీజేపీ అన్నట్టుగా పోరుసాగింది. మండలిలో కూడా అదే జరిగింది. దీంతో కాంగ్రెస్ పార్టీ నాగార్జునసాగర్‌ బై ఎలక్షన్‌లోనైనా ట్రెండ్ మార్చాలని వ్యూహం వేస్తోంది. ఎంత చేసినా నాయకులెవ్వరూ అనుకున్న స్థాయిలో కలిసి రావడం లేదు. కానీ సాగర్లో కలిసి పని చేద్దామంటే ఓ వర్గంతో జానారెడ్డి వైరం పెట్టుకున్నారు. ఇలాంటి పరిణామాల్లో జానా గెలుపు సాధ్యమేనా అనే అనుమానాలు కూడా వ్యక్తమవుతున్నాయి.
పట్టం కడుతారా..?
మండలి ఎన్నికల్లో ఓటమితో సీనియర్ నేత చిన్నారెడ్డి ప్రత్యక్ష ఎన్నికలకు దూరంగా ఉంటానని శపథం చేశారు. మరోవైపు ఉత్తమ్ గడ్డం శపథం కొనసాగుతూనే ఉంది. వరుసగా ఎన్నికల్లో ఘోరంగా పరాజయం పాలవుతున్న హస్తం నేతల్లో నైరాశ్యం నెలకొంది. సాగర్ ఉప ఎన్నికల్లో జానా కీలకమవుతున్నారు. జానారెడ్డికి పెట్టనికోటగా ఉండే సాగర్లో 2018 ఎన్నికల్లో టీఆర్ఎస్జెండా ఎగిరింది. ఇక్కడ ఈసారి జానారెడ్డి గెలుస్తారని ఒకింత ప్రచారం ఉన్నా… టీఆర్ఎస్ఉన్నఫళంగా దూకుడు పెంచింది. మండలిలో… రెండు పట్టభద్రుల స్థానాల్లో విజయం దక్కడంతో రాష్ట్రమంతా మా వెంటే ఉన్నారనే ధీమాతో గులాబీ దళం జోరు పెంచింది. సాగర్లో గెలిచి పట్టు మాదేననే సంకేతాలివ్వాలనుకుంటోంది.
కుమారుడిని పోటీలో దింపాలనుకున్నా..
ఇక సాగర్లో జానారెడ్డిపైనే కాంగ్రెస్ ఆశలు పెట్టుకుంది. ఒకదశలో టీఆర్ఎస్ కూడా జానారెడ్డికి అనుకూలంగా ఉందంటున్నట్లుగా నమ్మించింది. కానీ కారణాలేమైనా ఇక్కడ నుంచి పోటీ చేసేందుకు జానారెడ్డి కొంత తటపటాయించారు. తన కొడుకు రఘువీర్ను పోటీకి దింపే ప్రయత్నాలు కూడా చేశారు. కానీ అధిష్టానం మాత్రం ఒప్పుకోలేదు. నోముల మరణించిన నాటి నుంచే జానారెడ్డిని అభ్యర్థిగా ప్రకటనలు చేసింది. ఇదే సమయంలో ఇద్దరు కొడుకులతో జానా నియోజకవర్గంలో ప్రచారం మొదలుపెట్టారు. అయినా పోటీపై అనుమానాలున్న నేపథ్యంలో కాంగ్రెస్ పార్టీ రెండోసారి ప్రకటన చేయాల్సి వచ్చింది. జానారెడ్డి అభ్యర్థి అంటూ ఖరారు చేసింది.
కలిసి వచ్చేదెవరు?
ఇప్పుడు సాగర్లో పరిస్థితిపై కాంగ్రెస్ శ్రేణుల్లో… ప్రధానంగా జానారెడ్డికి కొంత భయం పట్టుకుందని పార్టీ నేతల టాక్. సాగర్లో జానారెడ్డి గెలుస్తారనే ప్రచారం ఉన్నా… క్షేత్రస్థాయిలో మాత్రం నమ్మకం కుదరడం లేదు. అందుకే ముందస్తుగా జానారెడ్డి పోటీకే అయిష్టంగా ఉంటున్నారని నేతల్లో ప్రచారం ఉంది. మరోవైపు పార్టీ నేతల మధ్య సయోధ్య లేదు. జానారెడ్డి ఇటీవలే రేవంత్వర్గాన్ని టార్గెట్ చేస్తూ వ్యాఖ్యలు చేశారు. ఇప్పుడు ఆ వర్గం ఎంత మేరకు పని చేస్తుందనేది అనుమానమే. అటు ఉత్తమ్, కోమటిరెడ్డి మధ్య విభేదాలు పాతవే. పైకి మాత్రం జానాను గెలిపించుకుంటామని ప్రకటించుకుంటున్నా ఎంత మేరకు కలిసి పని చేస్తారో అంతుచిక్కడం లేదు.
రాజకీయ సన్యాసమే
కాంగ్రెస్ నేతలు ఎన్నికల్లో ఓటమిపాలైతే ఎన్నికలకు దూరంగానే వ్యవహరిస్తున్నారు. చిన్నారెడ్డి ఏకంగా ప్రకటన చేశారు. ప్రత్యక్ష రాజకీయాలు… ఎన్నికలకు దూరంగా ఉంటానన్నట్లే చెప్పారు. ఇప్పుడు సాగర్లో జానారెడ్డి గెలిస్తే… పార్టీలో కూడా మంచి పదవే ఉంటుందనే ప్రచారం ఉంది. ఒకవేళ ఓడిపోతే… ఇక జానాకు రాజకీయ సన్యాసమేనా అనే టాక్ కూడా ఉంది. ఇప్పటికే రాజకీయాలకు దూరంగా ఉన్నట్టుగానే వ్యవహరిస్తున్నాడు. 2018 ఎన్నికల తర్వాత నియోజకవర్గంలో తిరగడం తగ్గించారు. ఉప ఎన్నికలు రావడంతో కొడుకులను వెంట బెట్టుకుని తిరుగుతున్నారు. ఇప్పుడు సాగర్లో గెలువకుంటే ఇక జానా రాజకీయాల నుంచి తప్పుకుంటాడని పార్టీ నేతలే చెప్పుతున్నారు. దీంతో సాగర్ ఎన్నికలు జానారెడ్డిని రాజకీయాల్లో ఉండనిస్తాయా… తప్పుకునేలా చేస్తాయా అనేది పార్టీలో జోరుగా నడుస్తున్న చర్చ.
