వంగవీటి రాధాకృష్ణ సంచలన వ్యాఖ్యలు

దిశ, ఏపీ బ్యూరో: దివంగత వంగవీటి మోహన రంగా తనయుడు, మాజీ ఎమ్మెల్యే వంగవీటి రాధాకృష్ణ సంచలన వ్యాఖ్యలు చేశారు. ఖమ్మం జిల్లా ఎర్రుబాలెం మండలం కొత్తపాలెం గ్రామంలో నిర్వహించిన మోహనరంగా విగ్రహావిష్కరణ సందర్భంగా రాధాకృష్ణ ఆసక్తికర వ్యాఖ్యలు చేశారు. “నా తండ్రి రంగాను అన్ని వర్గాల ప్రజలు గుండెల్లో పెట్టుకున్నారు. తరాలు మారినా, యుగాలు మారినా ఈ భూమి ఉన్నంత వరకు రంగా ప్రతీ ఒక్కరి గుండెల్లో కొలువై ఉంటారు. రంగా కాపులకు ఆరాధ్యదైవమైతే.. అన్ని వర్గాల పేదల గుండె చప్పుడు.

మన నాయకుడు రంగాని మనం కాపాడుకోలేక పోయాం. ఇప్పుడు అయినా మీ ఆవేశం తగ్గించి మంచి ఆలోచనతో ఉన్న నాయకులను అయినా కాపాడుకోమని కోరుతున్నా. నేడు పుట్టిన కులాన్ని తిట్టడం ప్రతి అడ్డమైనోడికి ఫ్యాషన్ అయిపోయింది. వాళ్లేదో గొప్పగా భావిస్తూ.. పుట్టిన కులాన్ని వెటకారం చేస్తున్నారు. ఈ కులం వారంతా ఐక్యంగా ఉంటే ప్రభుత్వాలనే పడగొట్టే సత్తా ఉంది. ఐకమత్యమే బలం.. ఉన్నవారిని అయినా కాపాడుకోండి” అని రాధా కీలక వ్యాఖ్యలు చేశారు. రాధాకృష్ణ వ్యాఖ్యలు చేస్తున్నంతసేపు జై జనసేన జై జనసేన అంటూ నినాదాలు సభలో మార్మోగాయి. అయితే రాధా వారిని కనీసం వారించలేదు. దీంతో పవన్ కల్యాణ్‌కు అండగా నిలవాలంటూ వంగవీటి రాధాకృష్ణ ప్రజలకు సూచించినట్లు తెలుస్తోంది. ప్రస్తుతం ఈ వీడియో సోషల్ మీడియాలో వైరల్‌గా మారింది.