ఆ పదవులు ఆంధ్రోళ్లకే దక్కుతున్నాయి.. వీహెచ్ సంచలన వ్యాఖ్యలు
దిశ, కాగజ్‌నగర్: రాష్ట్రంలో ముఖ్యమంత్రి చంద్రశేఖర రావు, దేశంలో ప్రధాని నరేంద్ర మోడీ ప్రజా సంక్షేమ పాలనలో పూర్తిగా వైఫల్యం చెందారని కాంగ్రెస్ సీనియర్ నేత వి.హనుమంతరావు అన్నారు. మంగళవారం కొమురం భీం ఆసిఫాబాద్ జిల్లా కాగజ్‌నగర్ పట్టణంలో జరిగిన కాంగ్రెస్ పార్టీ సభ్యత్వ నమోదు కార్యక్రమంలో ఆయన పాల్గొని మాట్లాడారు. తెలంగాణ రాష్ట్రాన్ని సోనియా గాంధీ ఇచ్చారని అన్నారు. డాక్టర్ అంబేద్కర్ అందించిన ఓటు హక్కును ప్రజలు అమ్ముకోకుండా కాంగ్రెస్ పార్టీకి ఓటు వేయాలని పిలుపునిచ్చారు. కాంగ్రెస్ పార్టీ గెలిస్తే మంచి పరిపాలన దక్కుతుందని చెప్పుకొచ్చారు. కేసీఆర్ రైతుల నుంచి వడ్లు కొనుగోలు చేయక పోవడంతో రైతులు ఆత్మహత్యలకు పాల్పడుతున్నారని గుర్తు చేశారు. సిర్పూర్ పేపర్ మిల్లులో ఉద్యోగాలు ఉత్తర ప్రదేశ్, బీహార్ వాళ్లకు, సిర్పూర్‌లో ఎమ్మెల్యే పదవులు ఆంధ్రోళ్లకు దక్కుతున్నాయని వీహెచ్ ఆవేదన వ్యక్తం చేశారు.
