వృద్ధుడిని దోచుకున్న కి‘లేడీ’లు అరెస్టు

దిశ, వెబ్‌డెస్క్ : దేశ రాజధానిలో ఇద్దరు కి‘లేడి’లు ఓ వృద్ధుడిని దోచుకున్నారు. పథకం ప్రకారం వెనుకాలే వెళ్లి కళ్లు మూసి తెరిచేలోగా బ్యాగులోని నగదును ఎత్తుకెళ్లారు. దీంతో ఆ చోర మహిళలను పోలీసులు అరెస్టు చేశారు. ఈ ఘటన దేశ రాజధాని ఢిల్లీలో వెలుగులోకివచ్చింది.

వివరాల్లోకివెళితే.. 62 ఏళ్ల ఓ వృద్ధుడు బ్యాంకులో రూ.50 వేలు విత్ డ్రా చేసి కౌంట్ చేస్తున్నాడు. అది గమనించిన మహిళలు వృద్ధుడిని అనుసరించి అతని బ్యాగులో నుంచి రూ.50వేల డబ్బును దోచుకెళ్లారు. సీసీటీవీ ఫుటేజీలో వారు దొంగతనం చేస్తున్న దృశ్యాలు కనిపించడంతో పోలీసులు వారిని పట్టుకున్నారు. మధ్యప్రదేశ్ రాష్ట్రంలోని రాజ్‌ఘడ్ జిల్లాకు చెందిన రేణు, జ్యోతి దోపిడీకి పాల్పడినట్లు తేలడంతో వారిని పోలీసులు అరెస్టు చేశారు.

పుష్పక్ విహార్ వద్ద ఖోఖా మార్కెటులో ఎన్‌‌బీసీసీ ప్లాజా వద్ద ఇద్దరు మహిళలు కనిపించగా వారిని అరెస్టు చేసినట్లు డీసీపీ అతుల్ కుమార్ ఠాకూర్ చెప్పారు. వారి నుంచి రూ.20వేలను స్వాధీనం చేసుకున్నామన్నారు. చోరీలో ముగ్గురు మహిళలు పాల్గొన్నారని, వారిలో కాళీ అనే మరో మహిళ తన వాటా చోరీ డబ్బు తీసుకొని స్వస్థలం వెళ్లిందని పోలీసులు గుర్తించారు.