ఘట్‌కేసర్‌ రేప్ కేసులో ఎవరూ ఊహించని ట్విస్ట్
దిశ ప్రతినిధి, మేడ్చల్: ఘట్‌కేసర్‌ పరిధిలోని నాగారం చౌరస్తాలో ఫార్మసీ విద్యార్థిని అత్యాచార ఘటనలో ఎవరూ ఊహించని ట్విస్ట్ నెలకొంది. గత మూడు రోజులుగా తెలుగు రాష్ట్రాల్లో ఈ వ్యవహారం హాట్ టాపిక్ గా మారింది. “ఆటోలో ప్రయాణిస్తుండగా… రూటు మార్చిన డ్రైవర్, అతని స్నేహితులతో కలిసి అత్యాచారానికి ఒడిగట్టినట్టు పోలీసులకు ఫిర్యాదు చేసింది. విచారణ ప్రారంభించిన పోలీసులు అనుమానితులను అదుపులోకి తీసుకుని విచారించారు. దర్యాప్తులో భాగంగా సీసీటీవీ ఫుటేజీ పరిశీలించిన పోలీసులు అసలు నిజమేంటో తెలిసి అవాక్కయ్యారు.
ప్రస్తుతం అందుతోన్న సమాచారం మేరకు.. యువతి ఆటో ఎక్కి రాంపల్లి వరకు వెళ్లి అక్కడ ద్విచక్ర వాహనంపై తన ప్రియుడితో కలిసి వెళ్లింది. ఆ తర్వాత అతని ఇద్దరు సోదరులతో కలిసి గంజాయి తీసుకున్నట్టు తెలుస్తోంది. ఆమె అనుమతితోనే వారంతా ఏకాంతంగా గడిపినట్లు సమాచారం. అదే సమయంలో తల్లి తరచూ ఫోన్ చేస్తుండటంతో ఆటో డ్రైవర్లు గుర్తు తెలియని ప్రదేశానికి తీసుకెళ్లారని చెప్పింది. దీంతో భయపడిన తల్లి పోలీసులను ఆశ్రయించింది.
అలర్ట్ ఐన పోలీసులు గాలింపు చర్యలు వేగవంతం చేశారు. ఆ ప్రాంతంలో సైరన్లు వినిపించడంతో.. భయపడిన యువకులు ఆమెను రహదారి పక్కన విడిచి వెళ్లిపోయారు. రోడ్డు పక్కనే యువతిని గుర్తించిన పోలీసులు హాస్పిటల్ లో జాయిన్ చేశారు. చికిత్స అనంతరం పోలీసులు ఆమెను ప్రశ్నించగా.. ఆటోడ్రైవర్లు అత్యాచారం చేశారని తెలిపింది. ఆటో డ్రైవర్లను అదుపులోకి తీసుకొని ప్రశ్నించిన పోలీసులు.. సీసీ కెమెరాలను పరిశీలించగా యువతి బైక్ పై వెళ్తున్నట్లు కనిపించింది. తీగ లాగితే డొంక కదిలినట్లు … ఆ దిశగా పోలీసులు విచారణ చేయగా అసలు విషయాలు బయటపడ్డాయి. స్నేహితులతో కలిసి యానంపేట పరిసరాల్లోకి వెళ్లానని యువతి అంగీకరించినట్లు సమాచారం.
