6 కోట్ల జీతం.. ఉచిత ఇంటి వసతి.. ఈ ఉద్యోగం చేసేందుకు ఎవరూ ముందుకు రారే..
దిశ, ఫీచర్స్ : వేగంగా పెరుగుతున్న జనాభా మధ్య, ఉద్యోగాల కొరత ఏర్పడింది. ఒక్క పోస్ట్‌కు కూడా వేలాది మంది దరఖాస్తు చేసుకోవడానికి పరుగులు తీస్తున్నారు. అయితే కొంతకాలం క్రితం పూణే నుంచి మూడు వేల మందికి పైగా ఇంజనీర్లు వాక్-ఇన్ ఇంటర్వ్యూ కోసం గుమిగూడిన వీడియోలు కూడా వైరల్ కావడం మనం చూసే ఉంటాం. గతేడాది కూడా హైదరాబాద్‌లో ఇలాంటి దృశ్యమే కనిపించింది. ఇదిలా ఉంటే 6 కోట్ల రూపాయల జీతం, నివసించడానికి ఉచిత ఇల్లు ఇచ్చిన తర్వాత కూడా ఎవరైనా ఉద్యోగానికి దరఖాస్తు చేసుకోకుండా ఉంటారా.. కాని అది నిజం ఆస్ట్రేలియాలో ఇలాంటి ఒక సంఘటనే జరిగింది. మిర ఆ పోస్టుకు సంబంధించిన ముఖ్యాంశాలను ఇప్పుడు మనం తెలుసుకుందాం.
news.com.au నివేదిక ప్రకారం పశ్చిమ ఆస్ట్రేలియాలో కారాడింగ్ అనే పట్టణం ఉంది. ఇక్కడ జనాభాలో ఎక్కువ మంది వ్యవసాయం పై ఆధారపడి జీవనం సాగిస్తున్నారు. ఇక్కడ ఒక్క వైద్యుడు కూడా లేడు. ఈ పట్టణం నగరాలకు చాలా దూరంలో ఉన్నందున, వైద్యులెవరూ ఇక్కడికి రావడానికి ఇష్టపడరు. ఇక్కడ ఒక జనరల్ ప్రాక్టీషనర్ (GP) ఉన్నారు. అతని కాంట్రాక్ట్ గత ఏడాది మార్చిలో ముగిసింది. దీంతో ప్రస్తుతం అక్కడి ప్రజలకు వైద్యం అందించేందుకు ఒక్క వైద్యుడు కూడా దొరకడం లేదు.
దాంతో స్థానిక పరిపాలన వైద్యులను పట్టణానికి తీసుకురావడానికి ఒక మిలియన్ ఆస్ట్రేలియన్ డాలర్లు (అంటే సుమారు రూ. 6 కోట్లు), నివసించడానికి నాలుగు గదుల ఇల్లు ఉచితంగా ఇచ్చింది. అయితే ఇది ఉన్నప్పటికీ ఎవరూ దరఖాస్తు చేసుకోవడం లేదట. కారణం ఆ ఊరు రాజధానికి 160 కి.మీ దూరంలో ఉండడం అంటున్నారు అక్కడి ప్రజలు. అది కూడా మారుమూల ప్రాంతంలో ఉండడం.
చివరగా జనవరి 2024లో దాదాపు 600 మంది జనాభా ఉన్న ఈ పట్టణంలో ఒక వైద్యుడు లభించాడు. ఆకర్షణీయమైన ఆఫర్ రావడంతో కొంత మంది దరఖాస్తు చేసుకున్నారని, అందులో ఒకరిని ఎంపిక చేశామని స్థానిక కౌన్సిలర్ తెలిపారు.
ఒక నివేదిక ప్రకారం ఆస్ట్రేలియా ఆరోగ్య సంరక్షణ వ్యవస్థ వైద్యుల కొరతను తీవ్రంగా ఎదుర్కొంటోంది. ముఖ్యంగా సాధారణ అభ్యాసకుల రంగంలో 2030 నాటికి 9,298 ఫుల్‌టైమ్ GPల కొరత ఏర్పడుతుందని నిపుణులు అంచనా వేస్తున్నారు. ఇది GP వర్క్‌ఫోర్స్‌లో 24.7%. దీంతో ఇక్కడి వైద్యులను ప్రలోభపెట్టేందుకు భారీగా జీతాలు ఇస్తున్నారు.
