నెంబర్ ప్లేట్ కనబడకుండా గుడ్డతో కట్టేసి.. పోలీసులకు దొరికిపోయాడు

దిశ, అదిలాబాద్: ట్రాఫిక్ పోలీసులు ఆకస్మికంగా స్పెషల్ డ్రైవ్స్ చేపట్టి నిబంధనలు ఉల్లంఘించినవారికి జరిమానాలు విధిస్తున్నారు. మంగళవారం పట్టణంలోని స్థానిక పంజాబ్ చౌక్ వద్ద ట్రాఫిక్ పోలీసులు స్పెషల్ డ్రైవ్ నిర్వహించారు. ఈ క్రమంలో ఓ ద్విచక్ర వాహనదారుడు నెంబర్ ప్లేట్ కనబడకుండా గుడ్డతో కట్టేశాడు. గమనించిన ట్రాఫిక్ పోలీసులు రూ.500 జరిమానా విధించారు. ఈ సందర్భంగా ట్రాఫిక్ సీఐ మాట్లాడుతూ ఉద్దేశపూర్వకంగా నెంబర్ ప్లేట్ ను కనబడకుండా చేసినా, వంచినా భారీ జరిమానా విధిస్తామని తెలిపారు. నెంబర్లు లేని వాహనాలను స్వాధీనం చేసుకొని చట్టరీత్యా చర్యలు తీసుకుంటామన్నారు. ఈ స్పెషల్ డ్రైవ్ లో ట్రాఫిక్ ఎస్ఐ సి. రామారావు, కానిస్టేబుళ్లు ఆశిష్ కుమార్, కంది నవీన్, జోగు శివశంకర్, ఎస్. శ్రీనివాస్ తదితరులు పాల్గొన్నారు.