ఖమ్మం టూ నాందేడ్ వయా హైదరాబాద్.. కొత్త గంజాయి రూట్

దిశ, చార్మినార్​ : ఖమ్మం నుంచి నాందేడ్‌కు కారులో గంజాయి తరలిస్తున్న ఓ ముఠాలోని నలుగురు వ్యక్తులను చాంద్రాయణగుట్ట పోలీసులు రెడ్‌హ్యాండెడ్‌గా అదుపులోకి తీసుకుని గురువారం రిమాండ్‌కు తరలించారు. వారి వద్ద నుంచి నాలుగు క్వింటాళ్ల గంజాయిని పోలీసులు స్వాధీనం చేసుకున్నారు.

చాంద్రాయణగుట్ట ఇన్‌స్పెక్టర్​ ప్రసాద్‌వర్మ తెలిపిన వివరాల ప్రకారం .. చాంద్రాయణగుట్ట జీఎం కాలనీకి చెందిన మహ్మద్​ అజర్ ఆలీ​(36), అదే ప్రాంతానికి చెందిన మహ్మద్​ మజర్‌ఆలీ(32) , యాకుత్‌పురాకు చెందిన మహ్మద్​ ఫిరోజ్(40), శంషాబాద్‌కు చెందిన షేక్​ అష్రఫ్‌ పాషా(24)లు టిఎస్​07 జిఎ 2390 నెంబర్​గల మహేంద్ర ఎక్స్​యూవీ కారులో ఈ నెల 2వ వతేదీన తెల్లవారు జామున 4గంటల ప్రాంతంలో ఖమ్మం నుంచి నాందేడ్‌కు గంజాయిని తరలిస్తున్నారు.

మార్గమధ్యలో నల్లవాగు దగ్గర కారు ఆగి ఉందన్న విశ్వసనీయ సమాచారం మేరకు చాంద్రాయణగుట్ట ఎస్‌ఐ వెంకటేష్​ బృందం ఆ కారును తనిఖీ చేయగా 8 సంచులలో నాలుగు క్వింటాళ్ల గంజాయిని పోలీసులు రెడ్‌హ్యాండెడ్‌గా స్వాధీనం చేసుకున్నారు. గంజాయి తరలిస్తున్న వారి అదుపులోకి తీసుకుని రిమాండ్​కు తరలించారు. పరారీలో ఉన్న మరో ముగ్గురి కోసం పోలీసులు గాలిస్తున్నారు.