దారుణం: మందుపార్టీకి పిలిచి.. మట్టుబెట్టారు

దిశ, చార్మినార్​: తనను చోరీ కేసులో పోలీసులకు పట్టించాడన్న అనుమానంతో పాటు సోషల్​ మీడియాలోను దొంగగా చిత్రీకరిస్తున్నాడని ఓ యువకునిపై పాతనేరస్థుడు కక్ష్యతో రగిలిపోయాడు. అదును చూసి మందు పార్టీ అంటూ పిలిచి చిత్తుగా ఆ యువకునికి మద్యం తాగించారు. మత్తులో చేరుకున్న యువకున్ని కత్తితో అతి దారుణంగా హత్యచేసి తప్పించుకు తిరుగుతున్న ముగ్గురు యువకులను హుస్సేనిహాలం పోలీసులు అరెస్టు చేసి రిమాండ్​కు తరలించినట్లు సౌత్​ జోన్​ డిసిపి గజరావు భూపాల్ వెల్లడించారు. దక్షిణమండలం డిసిపి కార్యాలయంలో మంగళవారం జరిగిన మీడియా సమావేశంలో అడీషనల్​ డిసిపి సయ్యద్​ రఫిక్​, చార్మినార్​ ఏసిపి భిక్షం రెడ్డి, ఇన్​ స్పెక్టర్లు దుర్గాప్రసాద్​, నరేష్​కుమార్​, చక్రవర్తిలతో కలిసి హుస్సేనిహాలం, బహదూర్​ పోలీస్ స్టేషన్​ల పరిధిలలో సంచలనం సృష్టించిన హత్య కేసులలో వివరాలను వెల్లడించారు.

ఫతేదర్వాజా కు చెందిన బట్టల షాపులో పని చేసే సాలం బిన్​ అబ్దుల్లా బాస్​లుమ్​ (23) ఓ దొంగతనం కేసులో అంబర్​ పేట్​ పోలీసులు అరెస్ట్​ చేసి రిమాండ్​ కు తరలించారు. ఇటీవలే బెయిల్ పై వచ్చిన సాలం బిన్​ తనను పోలీసులకు బహదూర్​ పురా కుచెందిన పండ్ల వ్యాపారి సయ్యద్​ జుబేర్ ఎలియాస్​ కచ్రా జుబేర్​​(22) పట్టించాడని మనసులో కక్ష్య పెంచుకున్నాడు. అంతేగాకుండా జుబేర్​ సోషల్​ మీడియాలో దొంగగా చిత్రీకరిస్తూ పోస్ట్​లు పెడుతున్నాడని, జుబేర్​ ను ఎలాగైనా మట్టుపెట్టాలని పథకం వేశాడు. దీంతో ఫతేదర్వాజా కు చెందిన పాతనేరస్థుడు మహ్మద్​ ముజాఫర్​ ఆలీఖాన్​(19) , చాంద్రాయణగుట్టకు చెందిన తారిఖ్​ ఆలీ(19) లతో కలిసి పథకం రచించాడు.

ముందుగా వేసుకున్న పథకం ప్రకారం ఈ నెల 12 వతేదీన అర్థరాత్రి జుబేర్​ను మందు పార్టీ అంటూ షాలిబండా లోని ఆషాథియేటర్​ ప్రాంగణంలో నిర్మాణంలో ఉన్న భవనానికి తీసుకెళ్లారు. అక్కడ సాలం బిన్​, మహ్మద్​ ముజాఫర్​ ఆలీ, తారీఖ్​ ఆలిలు జుబేర్​తో చిత్తుగా మద్యం తాగించారు. అనంతరం ఆటను మద్యం మత్తులో ఉన్నప్పుడు కత్తితో అతి దారుణంగా హతమార్చారు. అప్పటి నుంచి తప్పించుకుతిరుగుతున్న సాలం బిన్​, మహ్మద్​ ముజాఫర్​ ఆలీ, తారీఖ్​ ఆలిలను పోలీసులు అరెస్ట్​ చేశారు.