సోషల్ మీడియాలో వైరల్‌గా మారిన రౌడీ గ్యాంగ్ నిర్వాకం
దిశ, ఏపీ బ్యూరో: విశాఖపట్టణంలో రౌడీయిజం రాజ్యమేలుతోన్నది. పనిపాటాలేకుండా సొల్లు కబుర్లు చెప్పే యువకులు బ్యాచ్‌లుగా ఏర్పడి వైజాగ్ వాసులను భయభ్రాంతులకు గురిచేస్తున్న ఘటన మారికవలసలో చోటుచేసుకుంది. దీనికి సంబంధించిన వీడియో ఒకటి వైరల్‌గా మారడంతో కలకలం రేగింది. ఈ ఘటన వివరాల్లోకి వెళ్తే.. విద్యాసంస్థలకు నిలయమైన మారికవలస జంక్షన్ దగ్గర రాజీవ్‌ గృహ కల్పకు చెందిన దంతేశ్వరరావు స్నేహితుల దగ్గర కొద్ది మొత్తం అప్పు చేశాడు.
ఆ మొత్తం తీర్చకపోవడంతో నిందితుడు తన స్నేహితులతో కలిసి దంతేశ్వరరావును ఒక తోటలోకి తీసుకెళ్లి, చెట్టుకి కట్టి విచక్షణారహితంగా దాడికి పాల్పడ్డారు. మెడకు తాడు బిగించి భయపెట్టారు. దీనిని వీడియో తీసి వికృతానందం పొందారు. ఈ వీడియో సోషల్ మీడియాలో వైరల్ కావడంతో పోలీసులు స్పందించారు. దీనికి కారణమైన నలుగురు యువకుల్ని అదుపులోకి తీసుకోగా, వారిలో ఇద్దరు మైనర్‌లు ఉండడం విశేషం. వీరితో పాటు మరికొంతమంది గ్యాంగ్‌లుగా ఏర్పడి అరాచకాలకు పాల్పడుతున్నట్టు పోలీసులు గుర్తించారు.
