ఇకపై 10 నిమిషాల్లో వేడి వేడిగా ఫుడ్ డెలివరీ చేయనున్న జొమాటో!
దిశ, వెబ్‌డెస్క్: ప్రముఖ ఆన్‌లైన్ ఫుడ్ డెలివరీ సంస్థ జొమాటో త్వరలో 10 నిమిషాల్లో ఆహార పదార్థాలను వినియోగదారులకు చేరవేసే 'జొమాటో ఇన్‌స్టంట్' సేవలను ప్రారంభించనున్నట్టు సోమవారం ఓ ప్రకటనలో తెలిపింది. వచ్చే నెలలో మొదటగా ఈ కార్యక్రమాన్ని పైలట్ ప్రాజెక్టుగా తీసుకురానున్నట్లు పేర్కొంది. దీనికి సంబంధించి జొమాటో సీఈఓ దీపిందర్ గోయల్.. వినియోగదారులు తమ అవసరాలకు తగినట్లుగా తక్కువ సమయంలో డెలివరీ కావాలని డిమాండ్ చేస్తున్నారు. ఇందులో భాగంగానే జొమాటో రెస్టారెంట్ల భాగస్వామ్యంతో ఈ కొత్త ఫీచర్‌ను తీసుకొస్తుందని చెప్పారు.
ప్రపంచంలో ఇప్పటివరకు 10 నిమిషాల్లో వేడి, తాజా ఆహారాన్ని ఎవరు డెలివరీ చేయలేదు. దీంతో తాము మొదటిసారిగా దీన్ని ప్రారంభించిన రికార్డును సొంతం చేసుకోగలమని ఆయన వివరించారు. ఈ కొత్త సేవలు అధిక డిమాండ్ ఉన్న కస్టమర్లకు ఉండే దూరం, రెస్టారెంట్‌ రద్దీపై ఆధారపడి ఉంటుందని ఆయన అభిప్రాయపడ్డారు. కాగా, ఇటీవల పలు ఈ-కామర్స్ కంపెనీలు తమ కిరాణా సరుకుల డెలివరీని 10 నిమిషాల్లో అందించే విధానానికి దేశవ్యాప్తంగా మెరుగైన ఆదరణ వస్తున్న తరుణంలో జొమాటో ఈ నిర్ణయం తీసుకోవడం గమనార్హం.
