Sonam Kapoor: నటికి షాకిచ్చిన గజదొంగలు.. కోట్ల నగదు, నగలు మాయం
దిశ, సినిమా : సోనమ్ కపూర్, ఆనంద్ అహుజా ఇంట్లో దొంగలుపడ్డారు. ఈ మేరకు న్యూఢిల్లీలోని తమ న్యూ రెసిడెన్స్‌ నుంచి దాదాపు రెండుకోట్ల నగదు, జువెలరీ దోచుకెళ్లినట్లు తెలుస్తోంది. ఈ ఘటనపై ఫిర్యాదు అందుకున్న ఢిల్లీ పోలీసులు.. దర్యాప్తు కోసం స్పెషల్ స్క్వాడ్స్ ఏర్పాటు చేసినట్లు తెలిపారు. ఇందులో భాగంగా సోనమ్ ఇంట్లో పనిచేస్తున్న 25 మంది ఉద్యోగులతో పాటు 9 మంది కేర్‌టేకర్స్, డ్రైవర్లు, తోటమాలి, ఇతర కార్మికులను అదుపులోకి తీసుకుని విచారిస్తున్నట్లు వెల్లడించారు. ఈ ఇంట్లో ఆనంద్ పేరెంట్స్‌తో పాటు అతని నానమ్మ సరళ ఉంటుండగా.. ఫిబ్రవరి 11న అల్మారాలోని నగలు, నగదు తనిఖీ చేసినపుడు దొంగతనం జరిగిన విషయం తెలిసిందని సరళ తన ఫిర్యాదులో పేర్కొంది. అయితే ఇది హైప్రొఫైల్ కేసు కావడంతో ఇన్నాళ్లూ వివరాలను గోప్యంగా ఉంచినట్లు అధికారులు చెబుతున్నారు. ఇదిలా ఉంటే గత నెలలో ఆనంద్ తండ్రి సంస్థలో రూ. 27 కోట్ల మోసం జరిగినట్లు ఒక నివేదిక పేర్కొనగా.. ఈ కేసులో 10 మందిని అరెస్టు చేసిన సంగతి తెలిసిందే. ప్రస్తుతం గర్భవతిగా ఉన్న సోనమ్ తన తల్లి దగ్గర ఉంటోంది.
