బైక్‌ను ఢీకొట్టిన బొలేరో వాహనం.. ఇద్దరు మృతి
దిశ, పరిగి: మేడి కొండ నుంచి మన్నెగూడ వైపునకు వస్తున్న బైక్‌ను బొలేరో వాహనం వేగంగా ఢీ కొట్టింది. ఈ ప్రమాదంలో ఇద్దరు అక్కడికక్కడే మృతి చెందారు. చన్గొముల్ఎస్ఐ రాసుల శ్రీశైలం తెలిపిన వివరాల ప్రకారం.. వికారాబాద్ జిల్లా పూడూరు మండలం మేడికొండ గ్రామానికి చెందిన చాకలి రవీందర్(28), యాదిరెడ్డి (50 ) అను ఇద్దరు మోటార్ సైకిల్పై మంగళవారం ఉదయం మన్నెగూడ వైపునకు వస్తున్నారు. హైదరాబాద్–బీజాపూర్జాతీయ రహదారి 163 పై చీలాపూర్ గేట్ సమీపంలో ఎదురుగా వేగంగా వస్తున్న బొలేరో వాహనం ఢీ కొట్టింది.
ఈ ప్రమాదంలో చాకలి రవీందర్, యాదిరెడ్డి లు అక్కడికక్కడే మృతి చెందారు. విషయం తెలుసుకున్న పరిగి డీఎస్పీ శ్రీనివాస్ సంఘటన స్థలానికి చేరుకొని ప్రమాదానికి గల కారణాలు తెలుసుకున్నారు. బొలేరో వాహనం డ్రైవర్అక్బర్పరారీలో ఉన్నట్లు పోలీసులు తెలిపారు. ప్రత్యక్ష సాక్షి గొంగుపల్లి గ్రామస్తుడు ఖదీర్ ఫిర్యాదు మేరకు కేసు నమోదు చేసుకొని దర్యాప్తు జరుపుతున్నట్లు ఎస్ఐ రాసుల శ్రీశైలం తెలిపారు. మృత దేహాలను పోస్టు మార్టం నిమిత్తం ప్రభుత్వాస్పత్రికి తరలించారు.
