మొసలిని పెళ్లాడిన మేయర్ నవ వధువును ముద్దాడుతూ..
దిశ, ఫీచర్స్ : మెక్సికోలోని మూరుమూల గ్రామానికి చెందిన మేయర్ మొసలి(ఎలిగేటర్)ని వివాహమాడి వార్తల్లో నిలిచాడు. అంతేకాదు పురాతన ఆచారం ప్రకారం అచ్చం నవ వధువును తలపించేలా అలంకరించబడిన ఆ మొసలికి ముద్దు కూడా ఇచ్చాడు. ఈ వింత ఆచారానికి సంబంధించిన వీడియో ప్రస్తుతం ఆన్‌లైన్‌లో వైరల్‌గా మారింది.
మెక్సికోలోని ఓక్సాకా అనే చిన్న మత్స్యకార గ్రామానికి చెందిన మేయర్ విక్టర్ హుగో సోసా పురాతన సంప్రదాయ పద్ధతితలో ఏడేళ్ల వయసున్న మొసలిని గురువారం పెళ్లిచేసుకున్నాడు. అంతేకాదు నోరు కట్టేసిఉన్న ఆ సరీసృపాన్ని ముద్దాడాడు. ఒక్సాకాలోని చొంటల్, హువే స్వదేశీ కమ్యూనిటీల మధ్య శతాబ్దాల నుంచి ఈ సంప్రదాయం కొనసాగుతోంది. కాగా ఇది ప్రకృతి అనుగ్రహానికి చేసే ప్రార్థన వంటిదని.. సరిపడా ఆహారం కోసం వర్షాలు సమృద్ధిగా కురిసి నదిలో పుష్కలంగా నీరు ప్రవహించేందుకు ఈ విధంగా పూజిస్తామని సోసా చెప్పారు.
ఈ ఆచారంలో భాగంగా మొసలి పిల్లను తెల్లటి వివాహ దుస్తులతో పాటు ఇతర రంగురంగుల వస్త్రాలతో అలంకరిస్తారు. అంతేకాదు ఈ సరీసృపాన్ని లిటిల్ ప్రిన్సెస్‌గా పరిగణించడమే కాకుండా మాతృభూమికి ప్రాతినిథ్యం వహిస్తున్న దేవతగా నమ్ముతారు. కాగా మేయర్‌తో దాని వివాహం మానవులు దైవత్వం పొందడాన్ని సూచిస్తుంది. ఇక అంగరంగ వైభవంగా నిర్వహించిన ఈ పెళ్లి వేడుక వీడియో నెట్టింట వైరల్‌గా మారగా నెటిజన్లు మిశ్రమ స్పందన వ్యక్తం చేస్తున్నారు.
