చెంచుల జీవితాల్లో వెలుగులు నింపుతాం: గవర్నర్ తమిళిసై

దిశ ప్రతినిధి, మహబూబ్ నగర్ : చెంచుల జీవితాల్లో వెలుగులు నింపేందుకు తగిన చర్యలు తీసుకుంటామని రాష్ట్ర గవర్నర్ తమిళిసై సౌందర్య రాజన్ అన్నారు. శనివారం నాగర్ కర్నూలు జిల్లా నల్లమల అడవి ప్రాంతంలో నివాసముంటున్న చెంచు గుడాలను సౌందర్య రాజన్ సందర్శించారు. మన్ననూరు లోని మృగ వాణి అతిథి గృహానికి చేరుకున్న ఆమెకు జిల్లా అధికార యంత్రాంగం స్వాగతం పలికారు. ఈ సందర్భంగా ఆమె అటవీ శాఖ ఆధ్వర్యంలో ఏర్పాటు చేసిన సమీక్ష సమావేశం, ఫోటో ఎగ్జిబిషన్ లో పాల్గొన్నారు. ఆశ్రమ పాఠశాలకు చేరుకొని అక్కడ విద్యార్థులతో ముఖాముఖి మాట్లాడారు. అనంతరం ఆమె అప్పాపూర్ చెంచు గూడానికి చేరుకున్నారు. అక్కడ చెంచులు గవర్నర్‌కు సాంప్రదాయ రీతిలో నృత్యాలు చేస్తూ స్వాగతం పలికారు. ఈ సందర్భంగా గవర్నర్ చెంచుల ఇండ్లలోకి వెళ్లి వారి జీవన స్థితిగతులను స్వయంగా పరిశీలించారు. పలువురితో మాట్లాడి వివరాలు సేకరించే ప్రయత్నం చేశారు.

ఈ సందర్భంగా ఆమె చెంచుల ఆరాధ్యదైవాలు అయిన భ్రమరాంబ, మల్లికార్జున స్వామి, తదితర దేవతలను సందర్శించారు. అనంతరం వివిధ చెంచు పెంటలు నుంచి తరలివచ్చిన జనాన్ని ఉద్దేశించి గవర్నర్ మాట్లాడారు. మీ జీవితాల బాగు కోసం ఆరోగ్యం, విద్య, వైద్య రంగాలకు ప్రాధాన్యత ఇచ్చేందుకు తగిన ప్రణాళికలను రూపొందించి అమలు చేస్తామని చెప్పారు. జిల్లా కలెక్టర్ నేతృత్వంలో చెంచు పంటలకు అవసరమైన అభివృద్ధి కార్యక్రమాలు నిర్వహించేందుకు నిధులు కేటాయిస్తామని వెల్లడించారు. మరోసారి ఈ ప్రాంతాలలో పర్యటిస్తానని అప్పటి లోపు మీ జీవితంలో మార్పులు రావాలని గవర్నర్ చెంచుల కు విజ్ఞప్తి చేశారు.