ఆసక్తికరంగా రాష్ట్ర రాజకీయాలు.. ఢిల్లీకి వెళ్లిన జగ్గారెడ్డి
దిశ ప్రతినిధి, సంగారెడ్డి : కాంగ్రెస్ నేత, సంగారెడ్డి ఎమ్మెల్యే తూర్పు జగ్గారెడ్డి ఢిల్లీకి వెళ్లారు. భార్య, పిల్లలతో సహా ఆయన ఢిల్లీకి వెళ్లడం గమనార్హం. పీసీసీ అధ్యక్షుడు రేవంత్ రెడ్డితో ఏర్పడిన విభేదాల కారణంగా ఆయన కాంగ్రెస్ కార్యక్రమాలకు దూరంగా ఉంటూ వస్తున్న విషయం తెలిసిందే. ఓ సందర్భంలో పార్టీకి గుడ్ బై చెబుతానని కూడా ప్రకటించారు. కాగా పార్టీ అధిష్టానం ఇటీవల పార్టీ వర్కింగ్ ప్రెసిడెంట్ పదవీ బాధ్యతల నుంచి ఆయనను తప్పించిన విషయం తెలిసిందే. ఈ క్రమంలో మరింత ఆగ్రహించిన ఆయన రేవంత్ రెడ్డిపై మరోసారి తీవ్ర స్థాయిలో ఆరోపణలు చేసిన విషయం కూడా విదితమే.
జగ్గారెడ్డి తీరును పార్టీ అధిష్టానం సీరియస్‌గా తీసుకున్నదని, అతనిని పార్టీ నుంచి సస్పెండ్చేయనున్నట్లు పార్టీ వర్గాలు విస్తృతంగా ప్రచారం చేసుకున్నాయి. ఆయన మాత్రం అవేవి పట్టించుకోకుండా సంగారెడ్డి నియోజకవర్గంలో పర్యటిస్తూ ప్రజా సమస్యల పరిష్కారంపై దృష్టి సారించారు. ఇలా ఉండగా ఢిల్లీకి రావాలని జగ్గారెడ్డికి ఏఐసీసీ కార్యదర్శులు బోసురాజు, శ్రీనివాసన్లు రెండు రోజుల క్రితం ప్రత్యేకంగా ఫోన్లు చేసి పిలిచిన విషయం తెలిసిందే.
వారి ఆహ్వానం మేరకు ఆదివారం ఉదయం జగ్గారెడ్డి తన సతీమణి నిర్మల, కూతురు జయరెడ్డి, కొడుకు భరత్ సాయి రెడ్డిలతో కలిసి రైలులో ఢిల్లీకి బయలుదేరి వెళ్లారు. సోమవారం సాయంత్రం ఆయన కాంగ్రెస్ యువనేత రాహుల్ గాంధీతో భేటీ కానున్నారు. ఈ సందర్భంగా ఇద్దరి మధ్య ఏ అంశాలపై చర్చ జరగనున్నది..? జగ్గారెడ్డి స్పందన ఎలా ఉండనున్నదనేది రాజకీయంగా ఆసక్తి నెలకొన్నది.
