హోటల్‌‌లో 'వన్ నైట్' ఫ్రీ ఆఫర్.. కార్యం మొత్తం కనబడేలా కండిషన్స్!
దిశ, ఫీచర్స్ : ఫెస్టివల్స్, స్పెషల్ అకేషన్స్ సందర్భంగా కస్టమర్లను ఆకర్షించేందుకు హోటల్స్, షాపింగ్ మాల్స్ రకరకాల ఆఫర్లు ప్రకటిస్తుంటాయి. దీంతో జనాలు కూడా ఆ స్కీమ్స్‌ చూసి పరుగులు తీస్తుంటారు. తీరా అక్కడికెళ్లాక.. కండిషన్స్ అప్లయ్! బోర్డు చూసి నిరాశపడుతుంటారు. ఇపుడు స్పానిష్ ఐల్యాండ్‌లోని ఒక హోటల్ కూడా ఇలాంటి ఆఫరే ప్రకటించింది. అక్కడకు వచ్చే అతిథులకు రాత్రిపూట ఉచితంగా బస చేసే అవకాశం కల్పించింది. కానీ ఇందుకోసం పెట్టిన కండిషన్ మాత్రం ముక్కున వేలేసుకునేలా చేసింది.
పారడిసో ఆర్ట్ హోటల్‌లోని 'జీరో సూట్' గదికి ట్రాన్స్‌పరెంట్(గ్లాస్) గోడలు ఏర్పాటు చేశారు. అంతేకాకుండా ఆ రూమ్ హోటల్ లాబీలో ఉంటుంది. అంటే హోటల్‌కు విచ్చేసే ప్రతి ఒక్కరు అక్కడ బస చేసిన అతిథుల మొత్తం యాక్టివిటీని చూడగలరు. ప్రస్తుతం ఈ 'జీరో సూట్'లోనే ఉచిత బస అందిస్తుండగా.. ఈ వార్త సోషల్ మీడియాలో సంచలనం సృష్టించింది. ఇక ఈ విషయం గురించి తమ వెబ్‌సైట్‌లో ప్రస్తావించిన పారడిసో.. ఈ గదిలో ఒక రాత్రి ఫ్రీగా నిద్రపోవచ్చు. ఇది వాల్‌ఫ్లవర్స్‌కు తగినది కాదు కానీ కళాత్మక ప్రదర్శనలు, రేడియో ప్రసారాలు, DJ సెట్స్ కూడా అందుబాటులో ఉన్నాయి' అని పేర్కొంది.
రీసెంట్‌గా ఈ జీరో సూట్ గదిలో గడిపిన టిక్‌టాకర్ ఒలింపియా అన్లే.. తన అనుభవాన్ని వీడియో రూపంలో షేర్ చేసింది. గది గోడలు గ్లాస్‌తో ట్రాన్స్‌పరెంట్‌గా ఉన్నప్పటికీ బాత్ రూమ్ వాల్స్ మాత్రం అపారదర్శకంగానే ఉన్నట్లు తెలిపింది. ఇదొక పీడకల వంటిదని.. ఒంటి మీద బట్టలు లేకుండా పబ్లిక్‌లోకి వెళ్లిన ఫీలింగ్ కలిగిందని చెప్పింది.
