ఆదిలాబాద్‌లో ఉద్రిక్తం.. ది కాశ్మీర్ ఫైల్స్ సినిమా ప్రదర్శనలో ఘర్షణ

దిశ, ఆదిలాబాద్ : ఆదిలాబాద్ జిల్లా కేంద్రంలోని నటరాజ్ థియేటర్‌లో శుక్రవారం ఘర్షణ జరిగింది. ది కాశ్మీర్ ఫైల్స్ సినిమా ప్రదర్శిస్తుండగా మధ్యలో ఓ వర్గానికి చెందిన కొందరు యువకులు పాకిస్తాన్‌కు అనుకూలంగా నినాదాలు చేశారు. మరో వర్గానికి చెందిన యువకులు భారత్‌కు అనుకూలంగా నినాదాలు చేశారు. ఈ క్రమంలో ఇరువర్గాల మధ్య ఘర్షణ చోటు చేసుకున్నది. ఒకరిపై ఒకరు ప్రతి దాడులకు దిగినట్లు సమాచారం. థియేటర్ యాజమాన్యం పోలీసులకు సమాచారం ఇవ్వడంతో పోలీసులు హుటాహుటిన అక్కడకు చేరుకొని రెండు వర్గాలకు చెందిన యువకులను అదుపులోకి తీసుకున్నారు. వారిని స్టేషన్‌కు తరలించి విచారణ చేస్తున్నారు. ఈ ఘటనపై పూర్తి వివరాలు తెలియాల్సి ఉంది.