కేసీఆర్ దమ్ము ఏంటో ఇండియా మొత్తం చూసింది

దిశ, వెబ్‌డెస్క్: ఇచ్చిన ప్రతీ హామీని అమలు చేసి చూపించిన కేసీఆర్ దమ్ము ఏంటో ఇండియా మొత్తం చూసిందని సీఎం కేసీఆర్ అన్నారు. గురువారం అచ్చంపేటలో నిర్వహించిన బీఆర్ఎస్ ఆశీర్వాద సభలో సీఎం పాల్గొని మాట్లాడారు. దేశంలో 24 గంటల కరెంట్ ఇచ్చిన ఏకైక రాష్ట్రం తెలంగాణ అని గుర్తు చేశారు. ప్రధాని నరేంద్ర మోడీ సొంత రాష్ట్రమైన గుజరాత్‌లో కూడా 24 కరెంట్ లేదని ఎద్దేవా చేశారు. నిన్ననే అధికారంలోకి వచ్చిన కర్ణాటక రైతులకు ఉచిత కరెంట్ ఇవ్వలేని కాంగ్రెస్ పార్టీ.. తెలంగాణ రైతులకు ఇస్తానని నమ్మబలికే ప్రయత్నం చేస్తోందని.. దీనిని రాష్ట్ర రైతులందరూ గమనించాలని కోరారు. గతంలో 24 గంటల ఉచిత కరెంట్ ఇస్తామని తాము చెబితే కాంగ్రెస్ నేత జానారెడ్డి గజమెత్తు ఎగిరాడని.. ఆ పనే జరిగితే బీఆర్ఎస్ తరపున ప్రచారం చేస్తానని చెప్పాడని గుర్తుచేశారు.

‘కొందరు కేసీఆర్ దమ్ముందా? అని అంటున్నారు.. కొడంగల్‌కు రా.. గాంధీ బొమ్మ వద్దకు రా అంటున్నారు..’ ఇలాంటి సవాళ్లు చేయడమా? రాజకీయం అంటే అని అసహనం వ్యక్తం చేశారు. ఎన్నికల్లో ప్రజలు గెలిచే పరిస్థితి రావాలని ఆకాంక్షించారు. 24 ఏళ్ల క్రితం తెలంగాణ ఏర్పాటు కోసం బయలుదేరా.. నేను మొదలు పెట్టినప్పుడు ఒక్క సన్నాసి అయినా నా వెనుక వచ్చాడా? అని మండిపడ్డారు. ఎన్నికలు రాగానే ఎవరూ ఆగం కావొద్దని.. మంచేదో.. చెడేదో గమనించాలని పిలుపునిచ్చారు. మనలో 10శాతం లేని రాష్ట్రాల సీఎంలు కూడా ఇక్కడికొచ్చి ఉపాన్యాసాలు చెబుతారని హితవు పలికారు. తెలంగాణ ఆర్థిక పరిస్థితి పెరుగుతోందని చెప్పారు. ధరణి పోర్టల్ తీసుకొచ్చింది నా కోసమా? నా కుటుంబం కోసమా? అని అన్నారు. రాష్ట్ర ప్రజల కోసం ధరణి పోర్టల్ తీసుకొచ్చినట్లు తెలిపారు. రాహుల్ గాంధీ కూడా ధరణి పోర్టల్ తీసేస్తామని చెబుతున్నారు.. ఇలాంటి వ్యక్తులా? మనకు కావాల్సింది అని అడిగారు. ‘రేవంత్‌ రెడ్డి కొడంగల్‌కు రా.. కొడవలితో రా అంటున్నా.. దమ్ముంటే చూపించు అంటున్నారు.. కేసీఆర్ దమ్మేంటో ఇండియా మొత్తం చూసింది.’ అని కేసీఆర్ అన్నారు.