భద్రకాళి అమ్మవారిని దర్శించుకున్న లేడీ అఘోరీ

దిశ, వరంగల్ : తెలుగు రాష్ట్రాల్లో పర్యటిస్తున్న లేడీ అఘోరీ హాట్ టాపిక్ గా మారారు. తాజాగా వరంగల్ నగరంలో శుక్రవారం లేడీ అఘోరీ ప్రత్యక్షమయ్యారు. వరంగల్ నగరంలో హాట్ టాపిక్ గా మారిన లేడీ అఘోరి మామునూరు పోలీస్ స్టేషన్ ఎదురుగా గల స్మశాన వాటికను సందర్శించి అక్కడ నుంచి పాదయాత్రలో భద్రకాళి అమ్మవారి దేవస్థానానికి చేరుకొని అమ్మవారిని దర్శించుకున్నారు. ఆలయానికి చేరుకున్న అఘోరిని ఆలయ అధికారులు అడ్డుకొని సాంప్రదాయ దుస్తుల్లో వస్తేనే ఆలయంలోకి ఆహ్వానించి అమ్మవారి దర్శనం చేసుకునే సౌకర్యం కలిగిస్తామని సూచించారు. అనంతరం సాంప్రదాయ దుస్తులు ధరించి భద్రకాళి అమ్మవారిని అఘోరి దర్శించుకొని ప్రత్యేక పూజలు నిర్వహించారు. అనంతరం అఘోరి మాట్లాడుతూ… అమ్మవారి మహిమలు తనకు తెలుసని, తన కష్టాలను అమ్మవారికి చెప్పుకోవడానికే వచ్చానని, లోక కళ్యాణం కోసమే తను ఇలా చేస్తున్నానని, ప్రజలందరూ బాగుండాలని సనాతన ధర్మాన్ని, హిందూ అందరూ ఒకటలని పాటుపడుతున్నానని, ఇక్కడ నుండి కుంభమేళ కి వెళ్లి అక్కడ తన గురువులను కలిసి వారిని కూడా తీసుకొచ్చే ప్రయత్నం చేస్తానని తెలిపారు. అఘోరిని చూసేందుకు జనాలు తండోపతండాలుగా ఎగబడ్డారు. మామునూరు నుంచి భద్రకాళి ఆలయం వరకు పాదయాత్ర చేస్తున్న సమయంలో కిలోమీటర్ల దూరంలో ట్రాఫిక్ జామైంది.