కాంగ్రెస్‌లో విషాదం... ప్రముఖ నాయకుడు మృతి
దిశ, కాటారం: కాంగ్రెస్ సీనియర్ నాయకుడు కాటారం మాజీ బ్లాక్ కాంగ్రెస్ అధ్యక్షుడు, మాజీ జెడ్పీటీసీ పుల్లూరి రాజేశ్వరరావు మంగళవారం హఠాన్ మరణం చెందారు. దీంతో కాటారం సబ్ డివిజన్లోని ఐదు మండలాలలో విషాదఛాయలు నెలకొన్నాయి. కాటారంలో రాజకీయంగా సీనియర్ నాయకుడైన రాజేశ్వరరావు రాజకీయ అరంగేట్రం టీడీపీ ద్వారా చేసి ఆ తర్వాత కీర్తిశేషులు మాజీ స్పీకర్ శ్రీపాదరావు చేసిన అభివృద్ధి పట్ల ఆకర్షితుడై కాంగ్రెస్ పార్టీలో చేరి సుదీర్ఘంగా తమ సేవలందించారు. కాటారం గ్రామ సర్పంచ్ గా, మండల జడ్పీటీసీగా పదవులు నిర్వహించారు. ఆ తర్వాత బ్లాక్ కాంగ్రెస్ అధ్యక్షుడిగా బాధ్యతలు నిర్వహించారు. గత మూడు దశాబ్దాలుగా ఈ ప్రాంతంలో పేరొందిన నాయకుడు రాజేశ్వరరావు. సమస్యలు పరిష్కరిస్తూ ఈ ప్రాంతంలో ప్రజలలో మంచి పేరు సంపాదించి అజాతశత్రువుగా ఉన్నారు. రాజేశ్వరరావు మంగళవారం అస్వస్థతకు గురిగాగా చికిత్స కోసం వరంగల్ ప్రైవేట్ ఆస్పత్రికి తరలించారు. చికిత్స పొందుతూ ఆసుపత్రిలో మరణించిన వార్త దావనంలా మారుమూల గ్రామాలలోని ప్రజలందరికీ తెలియడంతో ప్రజలు శోక తప్తహృదయంతో ఉన్నారు. రాజేశ్వరరావు ఈ ప్రాంతానికి చేసిన ప్రజాసేవను స్మరిస్తూ సోషల్ మీడియాలో అతని ఆత్మకు శాంతి చేకూర్చాలని పోస్టింగులు పెడుతున్నారు.
