కేంద్రమంత్రి కిషన్ రెడ్డిని కలిసిన తెలంగాణ మంత్రులు!
దిశ, డైనమిక్ బ్యూరో: కేంద్రమంత్రి కిషన్ రెడ్డితో తెలంగాణ మంత్రులు కోమటిరెడ్డి వెంకట్ రెడ్డి, పొంగులేటి శ్రీనివాస్ రెడ్డి మర్యాధపూర్వకంగా భేటీ అయ్యారు. పార్లమెంట్ లో తెలంగాణ కాంగ్రెస్ ఎంపీల ప్రమాణస్వీకారం సందర్భంగా సీఎం రేవంత్ రెడ్డి, రాష్ట్ర మంత్రులు కోమటిరెడ్డి వెంకట్ రెడ్డి, పొంగులేటి శ్రీనివాస్ రెడ్డి తో పాటు పలువురు కాంగ్రెస్ నాయకులు ఢిల్లీ పర్యటనలో ఉన్నారు. ఈ నేపధ్యంలోనే సికింద్రాబాద్ ఎంపీ, కేంద్ర బొగ్గు, గనుల శాఖ మంత్రి కిషన్ రెడ్డిని మంత్రులు కోమటిరెడ్డి, పొంగులేటి లు కలిశారు. కేంద్ర మంత్రిగా పదవి చేపట్టిన సందర్భంగా కిషన్ రెడ్డిని వారు శాలువాతో సత్కరించారు. తెలంగాణ బిడ్డ కేంద్ర మంత్రి పదవి చేపట్టడం సంతోషంగా ఉందని వారికి శుభాకాంక్షలు తెలియజేశారు. అనంతరం కిషన్ రెడ్డితో మంత్రులు సమావేశం అయ్యారు. ఈ సమావేశంలో తెలంగాణ అభివృద్దిపై చర్చ జరిగినట్లు తెలిసింది. రాష్ట్ర అభివృద్దికి సహకరించాలని కిషన్ రెడ్డిని మంత్రులు కోరగా.. దానికి కిషన్ రెడ్డి సానుకూలంగా స్పందించినట్టు తెలిసింది. ఈ విషయాన్ని మంత్రి కోమటిరెడ్డి వెంకట్ రెడ్డి తన సోషల్ మీడియా ఖాతా ద్వారా తెలిపారు.
