సోనియా రాక సస్పెన్స్..? చివరి నిమిషంలో రాకుంటే స్ట్రాటజీ సెట్

దిశ, తెలంగాణ బ్యూరో: రాష్ట్ర ఆవిర్భావ సెలబ్రేషన్స్‌కు కాంగ్రెస్ అగ్ర నాయకురాలిని తీసుకొచ్చేందుకు ఆ పార్టీ గట్టి ప్రయత్నాలు చేస్తున్నది. గత కొన్ని రోజులుగా ఫోన్లలోనే సంప్రదింపులు చేసిన సీఎం రేవంత్‌రెడ్డి..మంగళవారం నేరుగా ఢిల్లీకి వెళ్లి సోనియా గాంధీని ఆహ్వానించారు. ఆమె తెలంగాణ ఆవిర్భావ ఉత్సవాలకు వచ్చేందుకు సానుకూలంగా ఉన్నారని సీఎం స్పష్టం చేశారు. దీంతో రాష్ట్ర కాంగ్రెస్ పార్టీలో సంతోషం వ్యక్తం అవుతున్నది. పరేడ్ గ్రౌండ్ సభ వేదికపై రాష్ట్ర ప్రజల పక్షాన సోనియా గాంధీకి భారీ సన్మానాలు చేయాలని పార్టీ ఆలోచిస్తున్నది. రాష్ట్ర సాంస్కృతిక కళలు, నృత్యాలతో వెల్‌కమ్ చెప్పడంతో పాటు, హర్షధ్వానుల మధ్య స్వాగతం పలకాలని ప్లాన్ చేస్తున్నారు.

ఇందుకోసం పార్టీ సాంస్కృతిక విభాగం ఆధ్వర్యంలో రిహార్సల్స్ కూడా చేస్తున్నట్టు తెలిసింది. ఒకవేళ సోనియా గాంధీ తన ఆరోగ్య పరిస్థితుల దృష్ట్యా రాష్ట్రానికి రాని పక్షంలో ప్రజల కోసం ఓ ప్రత్యేక వీడియో‌ను విడుదల చేసే చాన్స్ ఉన్నట్టు పార్టీ వర్గాలు చెబుతున్నాయి. అసెంబ్లీ ఎన్నికల్లో విడుదల చేసినట్టే, తెలంగాణ ప్రజలకు ఆవిర్భావ శుభాకాంక్షలు చెబుతూ రిలీజ్ చేయనున్నారు. తెలంగాణ ఏర్పాటు చేయాల్సిన ఆవశ్యకత, అప్పుడు కాంగ్రెస్ తీసుకున్న కీలక నిర్ణయాలు, రాష్ట్రంలో అమలవుతున్న ఆరు గ్యారంటీలు వంటి అంశాలపై సోనియా ఈ వీడియోలో చెప్పే అవకాశం ఉన్నట్టు చర్చ జరుగుతున్నది. మరోవైపు ఈ సెలబ్రేషన్స్‌కు రాహుల్ గాంధీ హాజరూ కూడా అనుమానంగానే ఉన్నట్టు తెలుస్తున్నది. సోనియా, రాహుల్, ప్రియాంకలను ముగ్గురినీ పార్టీ ఆహ్వానించింది. చివరి నిమిషం వరకు రాష్ట్రానికి తీసుకొచ్చేందుకు సీఎం తనదైన శైలిలో ప్రయత్నాలు చేస్తున్నారు.