రైతులను, ప్రజలను ఆదుకుంటాం

దిశ, మోమిన్ పేట్ : భారీ వర్షాలకు నష్టపోయిన రైతులను ప్రజలను ఆదుకుంటామని శాసనసభాపతి స్పీకర్ గడ్డం ప్రసాద్ కుమార్ అన్నారు. మంగళవారం మోమిన్ పేట్ మండల కేంద్రంలో జిల్లా కలెక్టర్ ప్రతిక్ జైన్ తో కలిసి పర్యటించారు. కాసుల బాధ పోయే బ్రిడ్జిలు, మల్రెడ్డిగూడెం బ్రిడ్జిను, రాంనాథ్ గుడిపల్లిబ్రిడ్జిను, రైల్వే బ్రిడ్జిలను పరిశీలించారు. ఈ సందర్భంగా స్పీకర్ మాట్లాడుతూ వికారాబాద్ జిల్లాలో ఆరు ఇండ్లు కూలిపోవడం జరిగిందని, అదేవిధంగా నాలుగు పశువులు చనిపోయినట్టు పేర్కొన్నారు. వాటికి ప్రభుత్వం తరఫున పరిహారం చెల్లిస్తామన్నారు.

రాష్ట్రంలో ఖమ్మం జిల్లాలో వర్ష ప్రభావం ఎక్కువగా ఉండడంతో అక్కడ తీవ్ర నష్టం జరిగిందని, రాష్ట్ర ముఖ్యమంత్రి రేవంత్ రెడ్డి అక్కడ రెండు రోజులుగా పర్యటిస్తున్నారని గుర్తు చేశారు. ములుగులో సీతక్క పర్యటిస్తున్నారని తెలిపారు. వికారాబాద్ జిల్లాలో ఏ సమస్య వచ్చినా తాము ఆదుకుంటామని స్పష్టం చేశారు. మోమిన్ పేట్ నుండి కాసుల బాధ బిడ్జిని, రామ్నాథ్ గుడిపల్లి గోవిందాపురం మల్రెడ్డిగూడెం రైతులకు అవసరమయ్యే కత్వాలను రెండు మూడు నెలలలో నిర్మిస్తామని తెలిపారు. ఈ కార్యక్రమంలో మండల పార్టీ అధ్యక్షులు శంకర్ యాదవ్, ఎమ్మార్వో మనోహర్ చక్రవర్తి, ఎంపీడీఓ విజయలక్ష్మి, ఎంపీఓ యాదగిరి, సుభాష్, మహంత్ కుమార్, కాంగ్రెస్ కార్యకర్తలు, సీఐ నవీన్ కుమార్, ఎస్సై అరవింద్, పోలీస్ సిబ్బంది పాల్గొన్నారు.