'ఆరు వారాల్లో వస్తున్నాం.. 6 గ్యారంటీలు అమలు చేస్తాం'
దిశ, ఆమనగల్లు : ఆరు వారాల్లో అధికారంలోకి వస్తున్నామని, ఆరు గ్యారంటీ పథకాలను అమలుపరుస్తామని ఏఐసీసీ కార్యదర్శి, మాజీ ఎమ్మెల్యే వంశీచంద్ రెడ్డి, కల్వకుర్తి కాంగ్రెస్ అభ్యర్థి కసిరెడ్డి నారాయణ రెడ్డి, రాష్ట్ర నాయకులు సుంకిరెడ్డి రాఘవేందర్ రెడ్డి అన్నారు. గురువారం కడ్తాల్ పార్టీ అధ్యక్షులు బిచ్య నాయక్ ఆధ్వర్యంలో కార్యకర్తల సమావేశం నిర్వహించారు. ఈ కార్యక్రమానికి వంశీచంద్ రెడ్డి, కసిరెడ్డి, సుంకిరెడ్డి, బాలాజిసింగ్, శ్రీనివాస్ గౌడ్ హాజరయ్యారు. అంతకముందు పట్టణ కేంద్రంలోని జాతీయ రహదారి పై వేలాదిమందితో భారీ ఎత్తున ర్యాలీ నిర్వహించారు. అనంతరం ఏర్పాటు చేసిన సమావేశంలో వంశీచంద్ మాట్లాడుతూ గిరిజనులకు రాజకీయాల్లో ప్రాధాన్యత కల్పించిన పార్టీ కాంగ్రెస్ అన్నారు. అనంతరం పార్టీ అభ్యర్థి కసిరెడ్డి నారాయణ రెడ్డి మాట్లాడుతూ కల్వకుర్తి నియోజకవర్గంలో విద్య, వైద్యం ఎమ్మెల్యే జైపాల్ యాదవ్ చేతకానీతనం వల్ల అభివృద్ధి కుంటుపడిందన్నారు.
సుంకిరెడ్డి రాఘవేందర్ రెడ్డి మాట్లాడుతూ రాష్ట్ర వ్యాప్తంగా కాంగ్రెస్ పార్టీకి కంచుకోట కల్వకుర్తి అని, అధికారంలోకి వచ్చేది కాంగ్రెస్ ప్రభుత్వమే అని ధీమా వ్యక్తం చేశారు. ఈ కార్యక్రమంలో జిల్లా జడ్పీ వైస్ చైర్మన్ బాలాజిసింగ్, పీసీసీ సభ్యులు అయిళ్ల శ్రీనివాస్ గౌడ్, డీసీసీ ప్రధాన కార్యదర్శి బిక్యానాయక్,ఎంపీపీ కమ్లి మొత్య నాయక్,అధికార ప్రతినిధి శ్రీనివాస్ రెడ్డి, మండలాల అధ్యక్షులు ప్రభాకర్ రెడ్డి, కిషన్ రెడ్డి, జగన్, వివిధ గ్రామాల సర్పంచులు, ఎంపీటీసీలు తదితరులు పాల్గొన్నారు.
