సైకో హల్‌చల్.. ఉపాధ్యాయుడుపై విచక్షణా రహితంగా దాడి

దిశ, మణుగూరు : మణుగూరులో ఓ సైకో వీరంగం సృష్టించాడు. దారిన పోతున్న వ్యక్తులపై వివిధ రకాలుగా దాడులకు పాల్పడుతున్నాడు. చేతిలో ఏది ఉంటే దానితో కిరాతకంగా కొడుతున్నాడు. వివరాలు ఇలా ఉన్నాయి. మైపా శంకర్ అనే వ్యక్తి మండలంలోని శ్రీ చైతన్య పాఠశాలలో రెండు సంవత్సరాల నుంచి పని చేస్తున్నారు. అయితే మంగళవారం తన సొంత ఊరు రాజుపేట నుంచి ఆర్టీసీ బస్‌లో పాఠశాలకు బయలుదేరి మణుగూరు సురక్ష బస్టాండ్‌లో దిగారు. అక్కడ స్కూల్ బస్ కోసం వేచిచూస్తున్నారు. ఈ క్రమంలో మండలానికి చెందిన అస్లాం అనే సింగరేణి ఉద్యోగి మద్యం తాగి బస్టాండ్ చుట్టూ తిరుగుతూ మహిళలను ఇబ్బంది పెట్టారని అక్కడ ఉన్న స్థానికులు చెబుతున్నారు.

గతంలో కూడా కొందరిపై దాడి చేశాడని తెలిసింది. అయితే ఈలోగా శ్రీ చైతన్య ఉపాధ్యాయుడు శంకర్ స్కూల్ బస్ కోసం వేచి చూస్తుండగా అకస్మాత్తుగా వెనుక నుంచి వచ్చి తన సెల్ ఫోన్‌తో శంకర్ తలపై బలంగా దాడి చేశాడని ఉపాధ్యాయుడు తెలిపాడు. అక్కడ వస్తువులతో ఇష్టమొచ్చినట్లు కొట్టి షెటర్ కేసి గుద్దాడు. అసలు ఎందుకు కొట్టాడో కూడా తెలియదని ఉపాధ్యాయుడు చెప్పడం గమనార్హం. శంకర్ తలకి బలమైన గాయం తగలడంతో స్థానిక ప్రభుత్వ ఏరియా ఆసుపత్రికి తరలించారు. వెంటనే వైద్యులు చికిత్స అందించి శంకర్ కు మూడు కుట్లు వేశారు. అనంతరం ఉపాధ్యాయుడు శంకర్ స్కూల్ ప్రిన్సిపాల్, డీన్ సహాయంతో స్థానిక పొలీస్ స్టేషన్ లో స్కూల్ ఫిర్యాదు చేశారు. వెంటనే ఫిర్యాదు అందుకున్న ఎస్సై శ్రీనివాస్ కేసు నమోదు చేసి దర్యాప్తు చేస్తున్నారు.