Metro: మెట్రోలో ఆన్‌లైన్ బెట్టింగ్ గేమ్ ప్రకటనలు! సజ్జనార్‌కు నెటిజన్ల కీలక విజ్ఞప్తి
దిశ, డైనమిక్ బ్యూరో: హైదరాబాద్‌లోని (Hyderabad Metro) మెట్రోలో ఆన్‌లైన్ బెట్టింగ్ గేమ్ ప్రకటనలు ఇవ్వడంపై సమాజిక మాధ్యమాల్లో నెటిజన్లు మండిపడుతున్నారు. ఈ మేరకు ఎక్స్ వేదికగా బెట్టింగ్ యాప్స్ ప్రమోషన్స్‌కు వ్యతిరేకంగా పోరాటం చేస్తున్న టీజీఎస్ఆర్టీసీ ఎండీ, ఐపీఎస్ అధికారి సజ్జనార్‌కు ఎక్స్ వేదికగా యూజర్లు రిక్వెస్ట్ చేస్తున్నారు. ఈ మేరకు తరుణ్ రెడ్డి అనే యూజర్ ట్వీట్ చేస్తూ.. ‘ఎందరినో బలి తీసుకొని ఎన్నో కుటుంబాలను ఆగం చేసిన ఈ బెట్టింగ్ మహమ్మారిపై, వాటిని ప్రమోట్ చేస్తున్న ఇన్‌ఫ్లూయెన్స‌ర్లపై మీరు గత కొన్ని రోజులుగా చేస్తున్న పోరాటానికి ధన్యవాదాలు సార్. అయితే మీరు ఒకవైపు ఈ మాఫియాపై యుద్ధం చేస్తుంటే మరోవైపు రోజూ కొన్ని లక్షల మంది ప్రయాణించే మన హైదరాబాద్ మెట్రోలో ఈ రకమైన బెట్టింగ్ ప్రకటనలు ఉన్నాయి. ఇలాంటి నిషేధిత ఆన్‌లైన్ బెట్టింగ్ గేమ్ ప్రకటనలకు హైదరాబాద్ మెట్రో ఎలా అనుమతులు ఇచ్చింది? దయచేసి దీనిపై చర్యలు తీసుకోగలరు’ అని పేర్కొన్నారు. మెట్రోలో బెట్టింగ్ గేమ్ ప్రకటనలపై నెటిజన్లు తీవ్రంగా వ్యతిరేకిస్తున్నారు.
