ట్రాక్టర్ ను ఢీకొట్టిన ట్రావెల్స్ బస్సు
దిశ, మిర్యాలగూడ : వాడపల్లి సమీపంలోని అద్దంకి నార్కపల్లి రహదారిపై రోడ్డు ప్రమాదం జరిగింది. ఇటుక లోడుతో వెళ్తున్న ట్రాక్టర్ ను ట్రావెల్స్ బస్సు ఢీకొట్టింది. ఈ ప్రమాదంలో ట్రాక్టర్ పై ప్రయాణిస్తున్న మహిళ కూలి మృతి చెందగా..మరో ముగ్గురికి తీవ్ర గాయాలయ్యాయి. ఆదివారం తెల్లవారుజామున దామరచర్ల మండలం వాడపల్లి సమీపంలోని అద్దంకి నార్కపల్లి రహదారిపై ప్రమాదం జరిగింది. స్థానికులు తెలిపిన వివరాల ప్రకారం.. దామరచర్ల మండలం బొత్తలపాలెం గ్రామానికి చెందిన మంద విమలమ్మ (36), నందిపాటి ఎల్లమ్మ, పోలేపల్లి బంగారమ్మ లతోపాటు.. ట్రాక్టర్ డ్రైవర్ అఖిల్ ఇటుక బట్టీల లోడుతో దామరచర్ల నుంచి దాచేపల్లి వైపు వెళ్తుంది. హైదరాబాదు నుంచి ఒంగోలు వైపు వెళ్తున్న ప్రైవేట్ ట్రావెల్స్ బస్సు ట్రాక్టర్ ను వెనక నుంచి బలంగా ఢీకొట్టింది. దీంతో ట్రాక్టర్ పై ప్రయాణిస్తున్న విమల అక్కడికక్కడే మృతి చెందగా మిగిలిన వారికి తీవ్ర గాయాలయ్యాయి. వెంటనే 108 సాయంతో మిర్యాలగూడ ఏరియా ఆసుపత్రికి తరలించి ,చికిత్స అందిస్తున్నారు. మృతురాలు బంధువుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు వాడపల్లి పోలీసులు తెలిపారు.
