కాంగ్రెస్ గెలుపుతోనే అభివృద్ధి సాధ్యం : వేముల వీరేశం

దిశ, నకిరేకల్: కాంగ్రెస్ అధికారంలోకి వస్తేనే అభివృద్ధి సాధ్యమవుతుందని కాంగ్రెస్ పార్టీ అభ్యర్థి వేముల వీరేశం తెలిపారు. చేసిన అభివృద్ధిని చెప్పే ధైర్యం లేక అనవసర ఆరోపణలు చేస్తున్న బీఆర్ఎస్ పార్టీ అభ్యర్థికి బుద్ధి చెప్పాలన్నారు. రాబోయే ఎన్నికల్లో రాష్ట్రంలో కాంగ్రెస్ పార్టీ అధికారంలోకి రావడం ఖాయమన్నారు. రామన్నపేట మండలం ఇంద్రపాల నగరంలో ఇంటింటి ప్రచారం నిర్వహించి మాట్లాడారు. రాబోయే 20 రోజులపాటు ప్రతి ఒక్కరూ ప్రచారం నిర్వహించి గెలుపుకు సహకరించాలని కోరారు. ఇంత పెద్ద మొత్తంలో ఘన స్వాగతం పలికిన మీ అందరికీ జీవితాంతం రుణపడి ఉంటాను. అధికారంలోకి రాగానే సోనియాగాంధీ ఇచ్చిన 6 గ్యారంటీలను వెంటనే అమలు చేస్తామన్నారు. ఐదేళ్లుగా నియోజకవర్గం అభివృద్ధికి ఆమడ దూరంలో ఉందని విమర్శించారు. ఓడిపోతానని భయంతోనే ఇష్టం వచ్చినట్లు మాట్లాడుతున్నారు. కోమటిరెడ్డి సోదరులపై విజ్ఞతను వదిలేసి ఇష్టం వచ్చినట్టు మాట్లాడిన వ్యక్తికి గుణపాఠం తప్పదు అన్నారు. ప్రచార కార్యక్రమంలో రాష్ట్ర నాయకులు పూస బాలకృష్ణ, వివిధ గ్రామాల ప్రజాప్రతినిధులు పాల్గొన్నారు.