ముష్టి రూ.300 కోట్లకు చంద్రబాబు ఆశ పడతారా..? మోత్కుపల్లి సంచలన వ్యాఖ్యలు

దిశ, వెబ్‌డెస్క్: టీడీపీ అధినేత, మాజీ సీఎం చంద్రబాబు అరెస్ట్‌పై బీఆర్ఎస్ నేత మోత్కుపల్లి నర్సింహులు సంచలన వ్యాఖ్యలు చేశారు. ప్రజల కోసం లక్షల కోట్లు ఖర్చు చేసిన పెద్ద మనిషి చంద్రబాబు.. అలాంటి వ్యక్తి.. ముష్టి రూ.300 కోట్లకు ఆశ పడతారా అని ప్రశ్నించారు. చంద్రబాబును అరెస్ట్ చేసినందుకు ఏపీ సీఎం జగన్ వెంటనే క్షమాపణ చెప్పాలని డిమాండ్ చేశారు. రాజమండ్రి సెంట్రల్ జైలులో చంద్రబాబుకు ఏదైనా జరిగితే సీఎం జగన్‌దే బాధ్యత అని అన్నారు. చంద్రబాబును అరెస్ట్ చేసినందుకు వచ్చే ఎన్నికల్లో జగన్‌కు ప్రజలు తగిన గుణపాఠం చెబుతారన్నారు. సీఎం జగన్‌ను నమ్మి ఏపీ ప్రజలు పూర్తిగా మోసపోయారని మోత్కుపల్లి కీలక వ్యాఖ్యలు చేశారు.

ఏపీలో ప్రభుత్వానికి వ్యతిరేకంగా మాట్లాడిన ప్రతిఒక్కరిని భయభ్రాంతులకు గురి చేస్తున్నారని ఆరోపించారు. జగన్ వైఖరిని ప్రజాస్వామ్యవాదులంతా ఖండించాలని కోరారు. కిరాతకుడిగా కాదు.. మనిషిగా మారాలని జగన్‌కు సలహా ఇస్తున్నానన్నారు. ఆంధ్రప్రదేశ్‌లో అనేక ఘోరాలు జరగుతున్నాయని అన్నారు. దళితులు, పేదలు తిరుగుబాటు చేయకముందే జగన్ క్షమాపణ చెప్పాలని డిమాండ్ చేశారు. ఏపీ సీఎం జగన్ దళిత ద్రోహి అని మోత్కుపల్లి సంచలన వ్యాఖ్యలు చేశారు. చంద్రబాబు అరెస్ట్ రాజ్యాంగ విరుద్ధమని ఫైర్ అయ్యారు.