Kukatpally MLA : అధికారుల నిర్లక్ష్యంతోనే అభివృద్ధి పనుల్లో జాప్యం జరుగుతుంది

దిశ,కూకట్​పల్లి: అధికారుల నిర్లక్ష్యంతోనే అభివృద్ధి పనుల్లో జాప్యం జరుగుతుందని ఎమ్మెల్యే మాధవరం కృష్ణారావు అన్నారు. బాలాజీ నగర్​ డివిజన్​ పరిధిలోని ధనలక్ష్మి సెంటర్​లోని నేతాజీ పార్కును ఎమ్మెల్యే మాధవరం కృష్ణారావు సోమవారం అధికారులతో కలిసి పరిశీలించారు. ఈ సందర్భంగా ఎమ్మెల్యే మాధవరం కృష్ణారావు మాట్లాడుతూ నేతాజీ పార్క్ అభివృద్ధి పనులు అసంపూర్తిగా ఉన్నాయని, అధికారులు నిర్లక్ష్యం కారణంగానే పనులు జరగడం లేదని ఆగ్రహం వ్యక్తం చేశారు. పార్క్ లో పారిశుధ్యం, విద్యుత్​, సివిల్​ పనులు పెండింగ్​లో ఉన్నాయని అన్నారు. స్థానికులు ఫిర్యాదుల మేరకు పార్కును సందర్శించడం జరిగిందని అన్నారు.

గత కొన్ని నెలలుగా నేతాజి పార్క్ నందు పనుల్లో అధికారులు జాప్యం చేస్తున్నారని, అధికారులు అలసత్వం తోనే పనుల్లో పురోగతి లేదని అన్నారు. పార్క్ లో వాకింగ్​ చేసుకుని వారు వాకింగ్​ ట్రాక్​ సరిగా లేక ఇబ్బంది పడుతున్నారని, పార్క్ లో విద్యుత్​ దీపాలు వెలగడం లేదని అన్నారు. అధికారులు అన్ని శాఖలను సమనయ్వం చేసుకుని పార్క్ లో అభివృద్ధి పనులు చేపట్టి, సమస్యలు లేకుండా చూడాలని సూచించారు. ఈ కార్యక్రమంలో కార్పొరేటర్​ జూపల్లి సత్యనారాయణ, మాజీ కార్పొరేటర్​ బాబురావు, మూసాపేట్​ సర్కిల్​ ఇంజనీరింగ్​ విభాగం డీఈ శ్రీదేవి, ఏఈ శ్రీనివాస్​, యూ బీడీ అధికారి విజయ రాణి, బీఆర్​ఎస్​ నాయకులు ప్రభాకర్​ గౌడ్​ తదితరులు పాల్గొన్నారు.