విలేకరుల పేరుతో అక్రమాలకు పాల్పడుతున్న వారిపై చర్యలు తప్పవు : ఏసీపీ చంద్రశేఖర్

దిశ, కూకట్​పల్లి : కూకట్​పల్లి ప్రాంతంలో ఇళ్లు కట్టుకునే వారు, బోర్లు వేసుకునే వారిని టార్గెట్​గా చేసుకుని కొంత మంది నకిలి విలేఖరులు వసూళ్లకు పాల్పడుతున్నారని ఫిర్యాదులు అందుతున్నాయని, చట్ట వ్యతిరేక చర్యలకు పాల్పడే వారిపై కఠిన చర్యలు తీసుకుంటామని కూకట్​పల్లి ఏసీపీ ఏ.చంద్రశేఖర్​ శుక్రవారం ఒక ప్రకటణలో తెలిపారు. ప్రభుత్వ కార్యాలయాలలో ఆర్​టీఐ చట్టం ద్వారా దరఖాస్తు చేసి బిల్డర్లను బ్లాక్​ మేయిల్​ చేస్తున్నట్టు తమ దృష్టికి వచ్చిందని, వరుస ఫిర్యాదులతో నిఘా పెట్టామన్నారు. నకిలి విలేఖరుల పట్ల ప్రజలు అప్రమత్తంగా ఉండాలని, ఎవరైన విలేఖరుల పేరుతో డబ్బులు డిమాండ్​ చేస్తే స్థానిక పోలీస్​ స్టేషన్​లో ఫిర్యాదు చేయాలని కేసునమోదు చేసి కఠిన చర్యలు తీసుకుంటామని ఏసీపీ చంద్రశేఖర్​ తెలిపారు.

డబ్బులు వసూలు చేస్తున్న వారిపై కేసు నమోదు : సీఐ నరసింగరావు

కూకట్​పల్లి ప్రాంతంలో నకిలి ఐడి కార్డులు చూపిస్తూ బిల్డర్లు, కాంట్రాక్టర్ల నుంచి డబ్బులు వసూలు చేస్తున్నట్టు వచ్చిన ఫిర్యాదు మేరకు కేసునమోదు చేసినట్టు కూకట్​పల్లి సీఐ నరసింగరావు తెలిపారు. క్రైం నంబర్​ 388/2023, ఐపీసీ 384 ప్రకారం నలుగురు విలేఖరుల పై కేసునమోదు చేశామని, పూర్తిస్థాయిలో దర్యాప్తు చేపడుతున్నామని సీఐ నరసింగరావు తెలిపారు. విలేఖరుల పేరుతో లేదా అధికారుల పేరుతో డబ్బులు డిమాండ్​ చేసిన, ఆర్​టీఐ చట్టాన్ని దుర్వినియోగం చేసి బెదిరింపులకు పాల్పడి డబ్బులు డిమాండ్​ చేసే వారిపై కూకట్​పల్లి ఎస్​హెచ్​ఓ 9490617123 నంబర్​కు ఫిర్యాదు చేయాలని, నకిలి విలేఖరుల పై చట్టరిత్యా కఠిన చర్యలు తీసుకుంటామని సిఐ నరసింగరావు తెలిపారు.