ఊరికి వెళ్లి వచ్చేసరికి ఇల్లు గుల్ల...
దిశ, గజ్వేల్ రూరల్: రోజు రోజుకు దొంగలు రెచ్చిపోతున్నారు. తాళం వేసి ఉన్న ఇండ్లను లక్ష్యంగా చేసుకుని దొంగతనాలు చేస్తున్నారు. ఇతర రాష్ట్రాల నుంచి వచ్చిన ముఠాలు అలాగే స్థానికంగా నేర చరిత్ర కలిగిన వ్యక్తులు చోరీలకు పాల్పడుతున్నారు. తాజాగా గజ్వేల్ పట్టణంలోని సంగాపూర్ రోడ్డులో తాళం వేసిన ఇంటి తాళాలు పగులగొట్టి ఆరు తులాల బంగారు ఆభరణాలతో పాటు, 65 వేల నగదును దొంగలు దోచుకెళ్లారు. వివరాల్లోకి వెళితే గజ్వేల్ పట్టణంలోని సంగాపూర్ రోడ్డులో నివాసముంటున్న రఘుపతి మూడు రోజుల క్రితం కుటుంబ సభ్యులతో హైదరాబాద్ వెళ్లాడు. శుక్రవారం తిరిగి ఇంటికి వచ్చి చూడగా చోరీ జరిగినట్లు గుర్తించాడు. ఇంటి తాళాలు పగులగొట్టి ఉన్నాయని ఇంట్లో నుంచి ఆరు తులాల బంగారు ఆభరణాలతో పాటు, 65 వేల నగదును అపహరించుకు పోయినట్లు ఆయన తెలిపారు. వెంటనే గజ్వేల్ పోలీసులకు సమాచారం ఇవ్వడంతో రంగంలోకి దిగిన పోలీసులు క్లూస్ టీం తో ఆధారాలు సేకరిస్తున్నారు. దొంగల కోసం గాలింపు చర్యలు చేపట్టినట్లు గజ్వేల్ సీఐ సైదా తెలిపారు.
