ఎన్నికల్లో గెలుపుకు కృషి చేయాలి

దిశ, సంగారెడ్డి : మెదక్ పార్లమెంట్ ఎన్నికల్లో బీఆర్ఎస్ కుటుంబ సభ్యులు గెలుపుకు కృషి చేయాలని బీఆర్ఎస్ మెదక్ పార్లమెంట్ అభ్యర్థి వెంకట్రామిరెడ్డి అన్నారు. శనివారం జిల్లా కేంద్రమైన సంగారెడ్డిలోని ఎమ్మెల్యే క్యాంపు కార్యాలయానికి వచ్చారు. మొదటి సారి వచ్చిన సందర్భంగా ఎమ్మెల్యే చింతా ప్రభాకర్, బీఆర్ఎస్ నాయకులు సన్మానించారు. ఈ సందర్భంగా బీఆర్ఎస్ నాయకులతో ఎన్నికల పై సమీక్షించారు. మెదక్ ఎంపీ స్థానం బీఆర్ఎస్ గెలిచేలా అందరూ కృషి చేయాలన్నారు. అదే విధంగా ఎన్నికల్లో కార్యకర్తలను సమాయత్తం చేసేందుకు త్వరలో మూడు నియోజకవర్గాలు కలిసి సమావేశాలు ఏర్పాటు చేయనున్నట్లు తెలిపారు. ఈ కార్యక్రమంలో ఎమ్మెల్యే చింతా ప్రభాకర్‌తో పాటు మాజీ గ్రంథాలయ సంస్థ చైర్మన్ నరహరి రెడ్డి, మాజీ సీడీసీ చైర్మన్ కాసాల బుచ్చిరెడ్డి, జీ.వీ.శ్రీనివాస్, యాదగిరి, చక్రపాణి, కసిని శ్రీకాంత్, జలంధర్ రావు తదితరులు పాల్గొన్నారు.