'మన ఓట్లు మనం వేసుకుందాం.. మన అభివృద్ధి మనమే చేసుకుందాం'
దిశ, పటాన్ చెరు : మన ఓట్లు మనమే వేసుకొని మన అభివృద్ధి మనమే చేసుకుందామని బీఎస్పీ పటాన్ చెరు ఎమ్మెల్యే అభ్యర్థి నీలం మధు ముదిరాజ్ అన్నారు. ఆదివారం ఎన్నికల ప్రచారంలో భాగంగా అమీన్ పూర్ మండలం పటేల్ గూడ గ్రామంలో స్థానిక నాయకులు, కార్యకర్తలతో కలిసి ప్రచారం నిర్వహించారు. ఈ సందర్భంగా ఆయన మాట్లాడుతూ బహుజన రాజ్యంతోనే బడుగులకు రాజ్యాధికారం వస్తుందన్నారు. మనం రాజకీయంగా ఎదిగితే తమ రాజకీయ భవిష్యత్తు అంధకారంలో పడుతుందని భయంతో కొందరు నాయకులు కుట్రలు చేసి మనల్ని అణచివేస్తున్నారని ఆరోపించారు.
మనల్ని ఎదగకుండా కుట్రలు చేసిన బీఆర్ఎస్, కాంగ్రెస్ పార్టీకి ప్రజలు బుద్ధి చెప్పాల్సిన అవసరం ఉందని ప్రజలకు తెలియచెప్పారు. ప్రజలకు కావలసిన మౌలిక సదుపాయాలైన రోడ్లు, అండర్ గ్రౌండ్ డ్రైనేజీలు, పార్కుల నిర్మాణం, చేస్తానని స్పష్టం చేశారు. గ్రామంలో అవరోధంగా మరీనా పరిశ్రమల కాలుష్యాన్ని కంట్రోల్ చేస్తానని తెలిపారు. ఈ కార్యక్రమంలో పార్టీ నాయకులు, కార్యకర్తలు, మహిళలు, యువకులు, కాలనీ వాసులు, ఎన్ఎంఆర్ యువసేన సభ్యులు, తదితరులు పాల్గొన్నారు.
