కేటీఆర్ ఇలాఖాలో మహేంధర్ రెడ్డి వ్యుహమిదే!
దిశ, సిరిసిల్ల ప్రతినిధి: రాజన్నసిరిసిల్ల జిల్లా సిరిసిల్ల నియోజకవర్గంలో కాంగ్రెస్ నేత కేకే మహేందర్ రెడ్డి రూటు మార్చారు. నిన్న మొన్నటి వరకు కరీంనగర్ కాంగ్రెస్ అధినాయకత్వంతో విభేదాలు చోటు చేసుకోని సిరిసిల్ల నియోజకవర్గానికి దూరంగా ఉన్న కేకే మళ్లీ తిరిగి సిరిసిల్ల నియోజకవర్గంలో పర్యటనలు షురూ చేశాడు. కాంగ్రెస్ సిరిసిల్ల నియోజకవర్గ ఇన్‌ఛార్జీగా వ్యవహరిస్తున్న కేకే మహేందర్ రెడ్డి నియోజకవర్గానికి, కాంగ్రెస్ సమావేశాలకు గత కొంత కాలంగా దూరంగా ఉండటంతో పార్టీ మారబోతున్నాడా..? అనే ప్రచారం సాగింది. కేకే వ్యుహమేంటనే ఆసక్తి నెలకొంది. మొత్తానికి కేకే మహేందర్ రెడ్డి సిరిసిల్ల నియోజకవర్గం బాట పట్టారు. శుక్రవారం ఎల్లారెడ్డిపేట మండలంలో పర్యటించి కాంగ్రెస్ క్యాడర్‌ను కలిసి ఛాయ్‌పే చర్చ చేశారు. సెస్ ఎన్నికలపై ముచ్చటించారు. మండలాల వారీగా సెస్ బరిలో ఎవరిని పెడితే బాగుంటుంది.. ఏం చేస్తే కాంగ్రెస్ గెలపు బాటలో ఉంటుందని కాంగ్రెస్ సీనియర్ల నుంచి అభిప్రాయ సేకరణ చేశారు. తాను పార్టీ మారబోతున్నట్లు వస్తున్న వార్తలను కొట్టి పారేశారు. హైదరాబాద్‌లో కోర్టు ప్రాక్టీస్‌లో కాస్తా బీజీగా ఉన్నందు‌వల్లే నియోకజవర్గ పర్యటనలో కాస్తా జాప్యం జరిగిందని కాంగ్రెస్ కార్యకర్తలకు చెప్పుకోచ్చారు. కొంత మంది కావాలనే తనపై తప్పుడు ప్రచారం చేస్తున్నారని అసంహనం వ్యక్తం చేశారు. అధికార పార్టీ నేతల తప్పుడు ప్రచారాన్ని ఎవరు నమ్మవద్దన్నారు. తాను ఏం చేసిన కార్యకర్తల అభిమతానికి అనుగుణంగానే చేస్తానని తెలిపారు. సిరిసిల్ల సెస్ ఎన్నికల్లో కాంగ్రెస్ ప్యానల్ అభ్యర్థుల గెలుపునకు కృషి చేయాలని విజ్ఞప్తి చేశారు.
పాదయాత్ర దిశగా..
టీఆర్ఎస్ వర్కింగ్ ప్రెసిడెంట్ కేటీఆర్ ఎమ్మెల్యేగా ప్రాతినిధ్యం వహిస్తున్న సిరిసిల్ల నియోకవర్గంలో కాంగ్రెస్ నేత కేకే మహేందర్ రెడ్డి పాదయాత్రను నిర్వహించేందుకు రంగం సిద్దం చేసుకుంటున్నారు. ఈ సారి అధికార పార్టీతో తాడో పేడో తేల్చుకునేందుకు కేకే సిద్దమవుతున్నారు. టీఆర్ఎస్ సర్కార్ హమీల విస్మరణ, తప్పిదాలు.. సిరిసిల్ల నియోజకవర్గంలో పాదయాత్ర చేసి ప్రజల ముందు ఉంచేందుకు రూట్ మ్యాప్ సిద్ధం చేసుకుంటున్నారు. ఈ విషయాన్ని సూచన ప్రాయంగా కాంగ్రెస్ శ్రేణులతో చర్చించారు. నియోజకవర్గంలో ప్రతి పల్లెను టచ్ చేసేలా పాదయాత్ర ఉండబోతున్నట్లు కేకే మహేందర్ రెడ్డి అతని అభిమానుల వద్ద పేర్కొన్నారు. కాంగ్రెస్‌లోనే కొనసాగుతానని, కాంగ్రెస్ కార్యకర్తలు ఎవరు ఆందోళన చెందాల్సిన అవసరం లేదన్నారు. కేకే మహేందర్ రెడ్డి సిరిసిల్లలో కేటీఆర్‌ను ఢీకొట్టేందుకు పాదయాత్రతో ముందుకు రావడంతో సిరిసిల్ల నియోజకవర్గంలో కేకే మళ్లీ హాట్ టాపిక్‌గా మారారు. ఇప్పటికే కరీంనగర్ మాజీ ఎంపీ పొన్నం ప్రభాకర్ సిరిసిల్లలో పాదయాత్ర నిర్వహించారు. ఇప్పుడు కేకే మహేందర్ రెడ్డి త్వరలో నిర్వహించబోయే పాదయాత్ర ఏ మేర ప్రజలపై ప్రభావం చూపనుందనేది త్వరలో తేలనుంది. కేకే తన ఏజెండాను త్వరలో ప్రకటిస్తానని పేర్కొనడంతో రాజకీయ చర్చ ప్రారంభమైంది.
Also Read.......
