ఎంబీబీఎస్‌ సీటు.. సాయం కోసం ఎదురుచూపులు
దిశ, హన్వాడ : చదువుకోవాలని ప్రతిఒక్కరికి ఉన్నా..ఉన్నత చదువులు చదివి అనుకున్నది సాధించడం కొందరికి మాత్రమే సాధ్యమవుతుంది. అందుకు కుటుంబ ఆర్థిక పరిస్థితులు కూడా అనుకూలంగా ఉండి తీరాలి. కానీ ఆర్ధిక పరిస్థితి సరిగా లేకపోతే అనుకున్న తీరానికి చేరలేక చాలా మంది విద్యార్థులు చదవాలని ఉన్నా చదువును మధ్యలోనే ఆపేస్తున్నారు. అదే పరిస్థితి మహబూబ్ నగర్ జిల్లా హన్వాడ మండలం చిన్న దర్పల్లి గ్రామానికి చెందిన వెంకటేష్ కు ఎదురైంది. గ్రామానికి చెందిన గోవిందు, శివానీలు కూలిపనులు చేసుకుంటూ ఇద్దరు కుమారులను, ఒక కూతురిని చదివిస్తున్నారు. తమ పెద్ద కుమారుడు వెంకటేష్ కు ఇటీవలే వరంగల్ కాలోజీ నారాయణరావు యూనివర్సిటీలో నీట్ లో MBBS సీటు సాధించాడు. అంత పెద్ద చదువులు చదివించడానికి తమ ఆర్ధిక పరిస్థితి లేదని తల్లిదండ్రులు చెప్పడంతో..తనను చదివించడానికి దాతలు ఎవరైనా సహాయం చేస్తారని వెంకటేష్ ఎదురుచూస్తున్నాడు. సంవత్సరానికి దాదాపు రెండు లక్షల రూపాయల వరకు ఖర్చవుతుందని వెంకటేష్ తెలిపారు. దాతలు ఎవరైనా ఉంటే ఆదుకోవాలని కోరారు.
