కన్నుల పండుగగా శ్రీ తిరుమలనాథ స్వామి వారి కల్యాణోత్సవం

దిశ, హన్వాడ : మండలం లోని మాదారం గ్రామంలో గల శ్రీ ర్యాకమకొండ దేవస్థానంలో సోమవారం శ్రీ తిరుమల నాథ స్వామి వారి కల్యాణం ఘనంగా జరిగింది. వేదమంత్రాల సాక్షిగా.. అశేష భక్త జనం సమక్షంలో శ్రీ తిరుమలనాథ స్వామి కళ్యాణోత్సవం కన్నుల పండుగగా జరిగింది. వేద పండితుల మంత్రోచ్ఛారణల, మేళతాళాల మధ్య వేడుక ఆధ్యంతం వైభవంగా జరిగింది. పట్టువస్త్రాలు అలంకరించుకున్న దేవతామూర్తుల కల్యాణ తంతును కనులారా వీక్షించేందుకు మండలంలోని గ్రామాల నుంచే కాకుండా జిల్లాలోని పలు ప్రాంతాల నుంచి భక్తులు వందలాదిగా తరలివచ్చారు.

పలు ప్రాంతాల నుంచి వచ్చి కల్యాణోత్సవం లో పాల్గొని స్వామి వారికి భక్తులు సేవ చేశారు.స్వామి వారికి తలనీలాలు, నైవేద్యాలు సమర్పించి భక్తులు మొక్కులు చెల్లించుకున్నారు. బీజేపీ జాతీయ ఉపాధ్యక్షురాలు, మహబూబ్ నగర్ ఎంపీ అభ్యర్థి DK అరుణ స్వామి వారిని దర్శించుకుని, ప్రత్యేక పూజలు చేశారు. ఈ సందర్భంగా అరుణ ను ఆలయ అర్చకులు సాధారంగా స్వాగతించారు. అనంతరం స్వామి వారి తీర్థ ప్రసాదాలను అందజేశారు.