టీ కాంగ్రెస్‌లో మరో ట్విస్ట్.. Bhattiకి Komatireddy Venkat Reddy ఫోన్!
దిశ, డైనమిక్ బ్యూరో: టీకాంగ్రెస్‌లో శనివారం మరో అనూహ్య పరిణామం చోటు చేసుకుంది. గత కొంత కాలంగా పార్టీ కార్యక్రమాలకు దూరంగా ఉంటున్న భువనగిరి ఎంపీ కోమటిరెడ్డి వెంకట్ రెడ్డి కాంగ్రెస్ సీనియర్లకు మద్దతుగా నిలిచారు. పీసీసీ కమిటీల నియామకం విషయంలో అసంతృప్తి వ్యక్తం చేస్తూ శనివారం సీఎల్పీ లీడర్ భట్టి విక్రమార్క నివాసంలో సీనియర్లు భేటీ అయిన సంగతి తెలిసిందే. ఈ నేపథ్యంలో భట్టి విక్రమార్కకు ఫోన్ చేసిన వెంకట్ రెడ్డి ఎలాంటి నిర్ణయం తీసుకున్నా మీ వెంటే ఉంటానని చెప్పినట్టు తెలుస్తోంది. దీంతో పార్టీలో రేవంత్ రెడ్డి వర్గానికి వ్యతిరేకంగా సీనియర్లు చేస్తున్న పోరాటానికి అనూహ్య మద్దతు లభించినట్టైంది. కాగా మొన్న మల్లికార్జున ఖర్గేతో భేటీ అయిన వెంకట్ రెడ్డి నిన్న ప్రధాని నరేంద్ర మోడీతో భేటీ అయ్యారు. ఆ మరుసటి రోజే హైదరాబాద్ లో కాంగ్రెస్ సీనియర్లు సమావేశం కాగా వారికి మద్దతుగా నిలుస్తానని చెప్పడం హాట్ టాపిక్ అవుతోంది. దీంతో కాంగ్రెస్ పార్టీలో ఏం జరుగబోతోందనే చర్చ జోరందుకుంది.
