హామీలను నెరవేరుస్తూ ముందుకు వెళ్తున్నాం

దిశ,ధర్మారం : హామీలను నెరవేరుస్తూ ముందుకు వెళ్తున్నాం అని రాష్ట్ర ఐటీ శాఖ మంత్రి శ్రీధర్ బాబు అన్నారు. ధర్మారం మండలంలో ఆయన పర్యటించారు. రోడ్డు మార్గం ద్వారా కరీంనగర్ నుండి వచ్చిన ఆయనకు విప్ అడ్లూరి లక్ష్మణ్ కుమార్ మల్లాపూర్ క్రాస్ రోడ్డు వద్ద కాంగ్రెస్ శ్రేణులతో కలిసి ఘన స్వాగతం పలికారు. అక్కడి నుండి పత్తిపాక గ్రామానికి చేరుకున్న ఆయన కాసేపు గ్రామాన్ని సందర్శించి గ్రామస్తులతో ముచ్చటించారు. అనంతరం గ్రామ శివారులోని నరసింహస్వామి గుట్ట వద్ద, ప్రభుత్వం నిర్మించ తలపెట్టిన పత్తిపాక రిజర్వాయర్ స్థలాన్ని పరిశీలించారు.

రిజర్వాయర్ నిర్మాణపు నమునాతో పాటు ఆ ప్రాజెక్టు నిర్మాణంలో కోల్పోతున్న రైతుల భూముల వివరాలను అడిగి తెలుసుకున్నారు. ఈ రిజర్వాయర్ నిర్మాణంతో ధర్మపురి నియోజకవర్గంలోని 10 వేల ఎకరాలతోపాటు పెద్దపల్లి జిల్లాలో రెండు లక్షల ఎకరాల వ్యవసాయం స్థిరీకరించనున్నట్టు చెప్పారు. ఈ కార్యక్రమంలో పెద్దపల్లి ఎమ్మెల్యే విజయరమణారావు, రామగుండం ఎమ్మెల్యే మక్కన్ సింగ్, కరీంనగర్ సుడా చైర్మన్ నరేందర్ రెడ్డి, జిల్లా కలెక్టర్ కోయా హర్ష, కాళేశ్వరం ప్రాజెక్ట్ ఈఈ నూనె శ్రీధర్ తోపాటు ఇరిగేషన్ అధికారులు పాల్గొన్నారు.